AMBENO, STLTIMORLESTE.com – Orsamentu Jeral Estadu (OJE) tinan 2026 neebe mak aloka ba Diresaun Servisu Rejional Aqua, Saneamentu no Ambiente, Rejiaun Administrativa Espesial Oecusse-Ambeno ((DSRASA)-RAEOA) hamutuk US$ 100.000 resin, ezekusaun 0% tanba impaktu husi mudansa estrutura Tranzitoriu ba Defenitivu. Aleinde nee mos Diresaun Servisu Rejional Agrikultura os ninia ezekusaun orsamentu too fulan Maiu ona mos sei 0%.
“Kona-ba ezekusaun OJE 2026, ami sei lao ho orsamentu husi Departementu SAS, ita iha osan boot maibe too agora pedidu ami hatama ona maibe ezekusaun maka sedauk lao, tanba pedidu ami hatama ona no sei iha hela prosesu iha Finansa RAEOA, dehan Diretor Diresaun Serbisu Rejional Agua, Saneamentu no Ambiente, Yoseph Ili ba STL iha Edifisiu Gabinete Autoridade RAEOA Oebau, Suku Costa, Postu Administrativu Pantemakassar Oecusse, Tersa (02/06/2026).
Hanesan ema hotu hatene no akompanha katak, foin daudaun iha loron 31 de Marsu 2026, iha mudansa ba organigrama RAEOA, tinan nee husi departementu SAS laiha projetu, maibe iha deit maka reabilitasaun, tanba nee orsamenu iha deit US$ 100.000 deit, tanba nee pedidu 5 hatama ona ba Finansas RAEOA, hela deit balun.
“Dadaun nee ami prepara tan pedidu balun atu hatoo tan ba Prezidente Autoridade RAEOA, bain hira fila mai Oecusse maka sei hatoo tan hodi hetan aprovasaun nunee ezekuta OJE 2026, tanba ita hotu hatene katak ezekusaun OJE 2026, atu tama tan ona ba trimestral II,” dehan nia.
Ezekusaun OJE 2026 ba DSRA-RAEOA too Fulan Maiu 0%
Iha sikun seluk, Diretor Diresaun Serbisu Rejional Agrikultura, Jose Oki mos informa katak, Ezekusaun Orsamentu Jeral Estadu (OJE) 2026 ba Diresaun Serbisu Rejional Agrikultura Rejiaun Administrativa Espesial Oecusse-Ambeno (DSRA-RAEOA), ate fulan Maiu, sei nafatin 0% tanba impaktu husi mudansa estrutura, tanba nee proposta hatoo ona ba Autoridade atu ezekuta no prosesu sei iha Finansa RAEOA.
Informasaun nee hatoo husi Diretor Rejional Agrikultura, Jose Oki ba STL iha ninia serbisu fatin, Santa Rosa, Suku Costa, Postu Administrativu Pantemakassar, RAEOA katak, impaktu husi ezekusaun OJE ba diresauan Rejional Agrikultura sei nafatin 0% tanba iha mudansa estrutura husi Tranzitoriu ba Defenitivu, entaun iha fali kabimentu foun, proposta hirak neebe hatam ona ba Finansa, sei iha prosesu.
“Ita nia OJE ba Diresaun Rejional Agrikultura Oecusse iha tinan 2026 ho montante US$ 812.065, ita hasae ona proposta ba Prezidente Autoridade Rejiaun Administrativa Espesial Oecusse-Ambeno (PA-RAEOA) iha kuartel Primeiru no Segundu, ho montante osan US$ 566.908, orsamentu nee sei iha faze proposta hela ba iha parte Finansas RAEOA, tanba kabimentu maka sei atraza uitoan, ita iha tan kabimentu foun tanba ita iha mudansa estrutura autoridade husi tranzisaun ba estrutura defenitivu, entaun afeita ba ezekusaun orsametu,” dehan Diretor Rejional Agrikultura, Jose Oki
Nia haktuir tan katak, tuir informasaun dehan proposta husi Diresaun Rejional Agrikulura nian sei iha kabimentu foun maka foin prosesa nee lao.
“Proposta ba OJE husi Diresaun Rejional Agrikultura maka atu sosa endow said, liga ho programa vaksinasaun, tanba ita prepara ona karau 200 ho luhan nee kompletu ona, agora ita atu sosa endow said, para bele aplika inseminasaun artefisial hadia kualidade karau iha Oecusse. Tanba nee kuandu proposta nee lao ona, kompanhia sei importa husi Singasari Malang-Indonezia nunee inseminator sira bele hahu aplika ona programa Inseminasaun artifisial nee,” dehan nia.
(jos)
