BAUCAU, STLTIMORLESTE.com – Inséndiu akontese tan ona iha Foho Matebian, fó ameasa ba uma lisan hamutuk 49 husi Suku Abo, Postu Administrativu Matebian, Munisípiu Baucau, ne’ebé lokaliza iha área ne’e.
Xefe Suku Abo, Fidelio Sarmento dos Santos, informa katak inséndiu ne’e deskonfia hahú iha loron 04 Novembru 2026, husi área estatua nian iha foho Matebian. To’o agora ahi sei kontinua lakan no alastra besik fatin ne’ebé iha loron 20 Agostu 2026 realiza serimónia komemorasaun Loron FALINTIL.
“Ahi ne’e lakan alastra ona ba distánsia kuaze kilómetru tolu. Uma lisan ne’ebé besik iha ne’ebá hamutuk 49, uma lisan hirak ne’e hotu pertense ba Suku Abo,” Fidelio hateten ba STL liuhusi telefone, Kinta (05/11/2026).
Nia esplika katak uma lisan 49 ne’e inklui Uasufa, Lualale no seluk tan. Nia preokupa katak posibilidade to’o iha loron 06 to’o 07 Novembru, inséndiu ne’e bele afeta diretamente uma lisan hirak ne’e, se ahi la konsege kontrola.
Nia subliña katak mezmu ekipa Bombeiru Munisípiu Baucau iha ona terrenu, maibé seidauk konsege atua diretamente atu hamate ahi, tanba fatin ne’ebé ahi lakan hela iha distánsia dook.
Nia deskonfia katak inséndiu ne’e mosu tanba peregrinante sira ne’ebé vizita Foho Matebian.
“Ne’e sira peregrinante sira sa’e ba foho matebian ne’e mak sunu. Agora daudaun ai lakan ne’e sei iha matebian leten, maibé dook tiha ona área estatua nian agora besik ona uluk 20 Agostu dada Bandeira nian ne’e,” Fidelio Akresenta
Nia deklara katak inséndiu iha Foho Matebian akontese kada tinan, ne’ebé kontinua ameasa uma lisan no estraga ai-horis sira iha foho ne’e.
Tanba situasaun ne’e, iha tinan hirak liubá, Autoridade Suku Abo estabelese ona regulamentu ki’ik atu bandu sidadaun sira ne’ebé la hetan autorizasaun atu sa’e ba Foho Matebian. Maski nune’e, vizita peregrinante sira ba foho ne’e kontinua, no inséndiu akontese tán iha loron 04 Novembru ne’e.
“Ohin PNTL sira bolu ona ema na’in 10 resin ba Esquadra Polísia. Komunidade mak informa katak Polísia lori ona sira ba Esquadra, maibé ha’u seidauk hatene ema hirak ne’e mai husi fatin ne’ebé,” Fidelio haktuir
Entertantu Autoridade Suku Abo kontinua monitoriza insendiu refere iha área foho Matebian.
(tom)
