DILI, STLTIMORLESTE.com – Diresaun Nasional Ensinu Sekundáriu Jeral (DNESJ) fo tempu ba eskola Sekundariu Jeral sira atu ezekuta konsesaun eskolar, maibe bainhira remata tenke submete relatóriu ba iha Ministeriu Edukasaun.
“Konsesaun eskolar nee tama ona no sira foin foti osan ba primeiru no segundu trimestre, agora eskola hotu foti hela ona, halo hela ezekusaun, bainhira hotu mak foin bele hatama relatóriu mai iha ministériu, ami mos sei fo tempu ba eskola sira halo ezekusaun, se ami foin fo ohin husu relatóriu, nee dala ruma sira bele inventa relatóriu,” dehan Diretor Nasional Ensinu Sekundariu iha ME, Benjamin Gomes da Cruz Fernandes ba STL iha nia knaar fatin ME, Kuarta nee (03/06/2026).
Benjamin dehan, nee duni agora nee falta eskola husi Munisípiu Ermera ho Bobonaro mak seidauk foti, tanba iha kode vendor nee iha mudansa oituan, maibe sira tenta katak, semana ida oin nee sira bele foti, maibe eskola hotu-hotu, hanesan eskola sekundariu jeral hotu foti ona konsesaun eskolar.
“Iha Ermera tanba mudansa iha eskola ida husi Railako nee tekvo muda fali ba sekundariu, nee presiza halo prosesu administrasaun hadia too iha finansas sentral, kona-ba ninia kode vendor, maibe semana ida nee nia laran bele foti ona,” nia deklara
(jac)
