DILI, STLTIMORLESTE.com – Produtu programa merenda eskolar mee la too bele troka fali ho ai-haan seluk neebe mak iha, ho nia kontiudu balansu ba nutrisaun neebe iha.
Haktuir Belchior Maria Almeida Barros, hanesan Xefe Departamentu Programa Merenda Eskolar iha ME ba STL iha nia knaar fatin, Sesta nee (05/06/2026).
“Kona-ba menu ba eskola sira ita estabelese ona, se produtu mak la too sira bele kompleta ho hahan seluk ho nia kontiudu balansu ba nutrisaun neebe iha. Se naan karau laiha bele troka ho tempe ga koto ou ho manu tolun daan, kona-ba ninia progresu ba implementasaun programa merenda eskolar nee hau hanoin ninia progresu lao diak hela,” tenik nia.
Entretantu Xefe Departementu Parke Eskolar iha Servisu Munisipal Edukasaun Baucau, Sabino Arlindo Ximenes aprezenta, implementasaun programa merenda eskolar ba anu letivu 2026 iha Baucau hahu iha fulan Janeiru no too inisiu fulan Junhu nee lao diak tuir mata dalan neebe indika ona, kada estudante benefisiariu hetan 0,42 sentavus, direitu atu hetan modo hanesan naan karau, manu tolu no seluk tan tuir mata dalan haruka, maibe iha eskola balu implementa programa refere fornese hahan ba estudante benefisiariu sira la tuir menu neebe iha.
“Ita nia diresaun rasik tuun ba observa direita katak, iha eskola balu implementa programa merenda eskolar lao duni maibe la tuir menu neebe mak iha,” hateten nia.
Nia sublina, eskola hirak neebe durante anu letivu 2026 implementa programa merenda eskolar fornese hahan ba estudante benefisiariu sira la tuir menu neebe indika ona, iha Postu Administrativu Baguia eskola 4, Quelicai eskola 3, Quelicai Antigu eskola 2, Matebian eskola 2 no iha Postu Administrativu Laga eskola 4. Husi eskola refere neebe estudante benefisiariu sira asesu hahan husi programa merenda eskolar la tuir menu neebe iha, mak hanesan estudante sira dala ruma la hetan modo naan karau tuir orariu neebe determina, maibe hetan fatin modo manu tolun.
“Iha menu nee dehan Kuarta han naan, mais sira labele asesu naan entaun troka fali manu tolun, entaun ita dehan sira la implementa tuir menu neebe iha por cauza de situação, tanba sira iha area remotas difisil tebes atu hetan naan,” Sabino akresenta.
Nia hatutan, eskola 15 refere eziste iha area remotas, tanba nee difisil hetan modo naan iha programa merenda eskolar tuir orariu difinidu, maibe situasaun nee akontese provizoriu deit, tanba iha tempu udan deit mak Ekipa Jestaun Programa (EJP) la halo kompras ba naan karau iha merkadu, tanba kondisaun estrada, enkuantu bainhira udan para parte EJP sempre asesu merkadu kompras naan karau hodi halo modo oferese ba estudante benefisiariu sira.
(jac)
