DILI, STLTIMORLESTE.com – Jurista Timor oan deklara katak, la presiza kriminaliza difamasaun no injuria sai krime, tanba se kriminaliza mak sei fo impaktu negativu.
“Iha Timor Leste ita la presiza kriminaliza difamasaun no injuria, tanba se Estadu kriminaliza difamasaun no injuria sai krime sei fo impaktu negativu ba liberdade espresaun no imprensa,” dehan Jurista Sergio Dias Quintas ba STL iha Kaikoli, Sexta (05/06/2026).
Nia hatutan, iha posibilidade boot ema sei tauk atu halo kritika ba estadu, tanba iha ona responsabilidade kriminal neebe bele lori ema tama kadeia.
Nia sublina, situasaun sira hanesa nee so akontese iha rezime ditadura, tanba uza forma hanesan nee para taka ema nia ibun labele halo kritika ba estadu.
Sergio esplika, nusa mak kestaun difamasaun no injuria la mantein nafatin hanesaun kestaun sivil, tanba iha ona lei sivil hodi rezolve, neebe previstu iha artigu 417 artigu 430 no artigu 479 husi Kodigu Sivil.
Nia parte afirma, fiar katak krime difamasaun no injuria nee mak eziste iha Kodigu Penal Timor Leste, alvu primeiru neebe sei hetan responsabilidade kriminal mak jornalista sira, pois tuir mai mak tuir sosiedade sivil. Nee ita atu ba fali ona kotuk, tanba laiha ona balansu iha demokrasia, espasu neebe iha mak poder obsoluta laiha kontrola sosial.
Iha fatin ketak, Akademiku UNTL, Sebastiao Dos Santos dehan, atu kriminaliza lei ida tenke haree didiak atu labele hamosu nia pasu negativu.
“Hanoin tenke haree didiak kordena ho parte hotu molok kriminaliza, atu nunee labele hamosu pasu negativu iha sosiedade,” dehan nia.
Nia hatutan, tenke fo espasu liberdade espresaun atu ema ida bele hatoo nia hanoin, kuandu sente buat ruma la justu ba nia.
(ter)
