DILI, STLTIMORLESTE.com – Diretor husi Eskola ESTV-IT 28 de Novembro Becora-Díli, Tomas Pinto seidauk iha karta ruma husi Ministériu Eduksaun (ME), liga ba diploma falsu neebe husi ministeriu refere fo sai ba públiku.
“Ami la rekonhese relasiona ho falsifikasaun ba diploma, neebe ami seidauk iha karta konhesimentu ruma husi ME, tantu nivel Munisipal ou Nasional, tanba laiha ema ida bolu ami tanba laiha falsifikasaun diploma iha eskola ESTV-IT 28 de Novembro, parese uluk ESG. Los ka la los mos seidauk iha klareza husi ME mai ami nia eskola,” afirma Diretor Eskola ESTV-IT 28 de Novembro Becora-Díli, Tomas Pinto ba STL iha nia knaar fatin, Kuarta nee (10/06/2026).
Iha fatin seluk, Diretor Eskola Sekundariu Jeral no 4 de Setembro Balide, Sergio A. da Cruz hatete, relasiona ho Ministériu Eduksaun (ME) neebe fo sai detekta diploma falsu 31, husi eskola 8 inklui Eskola Sekundariu Jeral no 4 de Setembro, maibe husi ME seidauk bolu Diretor ESJ 4 de Setembro Balide, hodi klarifika asuntu nee.
“Nee mak la hatene, tanba hau seidauk haree, maibe asina iha diploma nee falsu. Ema ruma mak uza naran eskola, nee mák la hatene, tanba husi Ministeriu Edukasaun seidauk bolu hau ba haree,” dehan Sergio.
Antes nee Direitor Jeral Ensinu Sekundáriu, Deolindo da Cruz dehan, diploma hira nee diresaun nasional ESJ identifika bainhira sira lori mai legaliza desde Janeiru 2026 too agora. Diresaun mos bolu kedan nain mai hodi hatete ba sira katak,diploma falsu no labele fo fila fali. Nain ba produs diploma mak Ministériu Eduksaun, nee duni wainhira identifika katak diploma neebe sidadaun sira kaer detekta falsu ministeriu sei priende hodi prosesa tuir regras.
“Ohin loron diresaun jeral entrega diploma falsu hamutuk 31 ba inspesaun Ministériu Eduksaun (ME) hodi prosesa tuir regra neebe vigor iha ita nia rain,” dehan Deolindo.
Nia dehan, husi diploma falsu hirak nee mai husi ema uza naran eskola nian hanesan Eskola Hati Kudus Yesus nee diploma tempu Indonezia nian, diploma falsu tolu, ESJ 28 Novembru eskola neebe agora konvente ona ESTV diploma falsu 4, ESJ 12 Novembru diploma falsu 2, ESJ 4 Setembru falsu 12, ESJ pribadu Cristal diploma falsu 4, ESJ katolika paulu VI diploma falsu 3, ESJ 1912 Same diploma falsu 2, ESJ no Liquica diploma falsu 1, total hamutuk 31, husi 31 diploma nee kompostu husi mane 21 no feto 10, iha kapital Dili eskola 6, Munisipiu eskola 2 mak Manufahi ho Liquica.
(jac)
