DILI, STLTIMORLESTE.com – Eskola Sekundária Jerál 10 Dezembru, Comoro, foti ona númeru finalista na’in 461 ba ezame nasionál no ezame lokál, segunda-feira (12/10).
Diretór Eskola Sekundária Jerál 10 Dezembru, Manuel Verdial, hatete ba STL katak eskola foti númeru finalista sira iha Edukasaun Munisípiu Dili atu bele konklui preparasaun administrativu ba ezame rua ne’e.
“Númeru finalista sira nian ohin mak ami foin foti iha Edukasaun Munisípiu Dili, tuir dadus ne’ebé ami hatama ona antes,” Manuel Verdial dehan.
Nia esplika katak númeru ne’e hanesan kartaun identifikasaun ba estudante sira ne’ebé sei tuir ezame nasionál no ezame lokál.
Verdial hatutan katak eskola prepara sala hamutuk 24 atu simu estudante sira durante ezame nasionál no ezame lokál.
Nia husu estudante sira atu aproveita tempu ne’ebé iha hodi estuda no prepara an antes tama ba ezame.
“Ami husu estudante sira atu prepara an no estuda didi’ak, tanba loron ba ezame nasionál no ezame lokál besik ona,” nia afirma.
Estudante Delfina Magno mós hatete katak nia kontinua prepara an liuhusi estudu, tanba loron ba ezame nasionál no ezame lokál besik ona.
“Ita rasik mak presiza prepara an, tanba loron ba ezame nasionál no ezame lokál konta de’it ona. Atu hetan rezultadu di’ak, ita tenke estuda,” Delfina Magno dehan.
Estudante seluk, Maria Guterres, dehan katak nia prepara an ona atu tuir ezame nasionál no ezame lokál, tanba konsidera edukasaun importante ba nia futuru.
“Agora hau prepara an ona atu tuir ezame nasionál no ezame lokál, tanba loron ba ezame besik ona. Tanba ne’e, ami tenke estuda no prepara an didi’ak,” Maria Guterres deklara.
(jac)
