DILI, STLTIMORLESTE.com – Ministeriu Edukasaun (ME) kestiona manorin balun ho nivel bacharelatu sei kontinua hanorin estudantes sira iha nivel sekundariu jeral.
Haktuir Diretor Nasional Ensinu Sekundariu iha ME, Benjamin Gomes da Cruz Fernandes ba STL iha salaun Ian Martin Balide, Kinta nee (11/06/2026).
“Tuir lei baze de edukasaun hakerek iha nee ba dehan katak, ema atu hanorin iha ensinu sekundariu, minimu nee tenke ho lisensiatura, agora daudaun ita hotu hatene katak, iha ensinu sekundariu jeral sei iha manorin balun sei ho nivel bacharelatu, maibe ministeriu sei haree no tetu didiak, haree ba nesesidade hanorin iha eskola hotu, haree ba buat sira nee hotu foin bele halo kolokasaun entre manorin sira nee ba fali iha ensinu baziku,” nia komenta.
Nia dehan, buat hirak nee liu husi prosesu ida, tanba bainhira muda fali sira ba iha ensinu baziku tuir lei, ME sei haree hikas fali se mak atu substitui fali iha sira nian fatin, tanba ida nee balun too agora halao ona balun seidauk, nunee ME sei haree ba iha nesesidade husi eskola ida-idak nian neebe mak iha teritoriu laran.
Nunee mos Diretor Eskola Sekundariu Nobel da Paz, Jeremias P. de Jesus dehan, profesores neebe hanorin nee maioria ho nivel lisensiatura mak hanorin iha sira nian eskola no kada loron sira sempre kumpri ba iha regulamentu neebe mak iha ona.
“Hau hanoin profesores neebe hanorin nee maioria ho nivel lisensiatura mak hanorin iha sira nian eskola no kada loron sira sempre kumpri ba iha regulamentu neebe mak iha ona,” nia esplika.
(eme)
