DILI, STLTIMORLESTE.com – Komando Jeral (KomJer) Polisia Nasional Timor Leste (PNTL) nomeia ona atuál Komandante Komando Pesoa Formasaun Komisáriu Asisténte Polísia José Soares no Superintendente Xefe Polísia Ismael Babo hodi lidera ekipa juri ba rekrutamentu foun ba vaga polisia nian.
“Hau hili ona ema nain rua, Komandante José no Komandante Ismael Babo,” hatete Komandante Jerál Afonso dos Santos ba jornalista sira hafoin hasoru malu ho Ministru Interiór, Francisco da Costa Guterres iha Ministeriu Interiór, Vila Verde, Tersa (16/06/2026).
Nia dehan, nuudar Komandante Jerál PNTL fo konfiansa másimu ba ofisiál Superiór PNTL hodi lidera komisaun rekrutamentu liu-liu hodi sai juri iha rekrutamentu vaga ba membru PNTL foun nee.
“Hau fo konfiansa ba hau nia ema, halo nusa mak hau labele konfiansa, garante prosesu rekrutamentu sei lao diak no transparante no justu,” nia afirma.
Nia hatutan, Komando hatoo hela preparasaun rekrutamentu vaga membru PNTL foun sira ba Ministru Interiór (MI).
“Iha enkontru nee laiha orientasaun seluk, orientasaun mak nee, prepara ba rekrutamentu vaga membru PNTL foun nain 750 atu tama sentru formasaun”, nia informa.
Komisáriu nee deklara, ba rekrutamentu vaga PNTL nee buat hotu prepradu ona no fulan Julhu sei hahú anúnsia vaga rekrutamentu membru PNTL foun.
Nia esplika, Governu liu husi Konselhu Ministru aprova ona rekrutamentu vaga membru polísia nee hamutuk nain 750, nunee iha rekrutamentu númeru referida sei mantein.
“Agora daudaun halao hela prosesu, labele dehan prosesu nee too ona iha neebe. Los ga lae, hau lakohi barak ida, ba futuru mak hau sei koalia”, nia tenik.
(jen)
