DÍLI, STLTIMORLESTE.com – Profesores Eskola Sekundária Jerál 5 de Maio Becora entrega ona pontus ezame III períodu ba Komisaun Organizadora, iha preparasaun ba ezame 23 Novembru 2026.
Adjuntu Diretór Eskola Sekundária Jerál 5 de Maio Becora, Lobato Mota Pereira, konfirma informasaun ne’e ba STL, Kinta (05/11/2026).
Nia esplika katak, antes tama feriadu, eskola realiza ona enkontru ho konsellu dosente atu prepara prosesu realizasaun ezame III períodu.
“Depois 12 Novembru, Komisaun Organizadora sei hahú hala’o preparasaun máximu ba realizasaun ezame refere,” nia esplika.
Lobato hatutan katak, hafoin feriadu selebrasaun loron finadu, estudante sira foin hahú fila fali ba eskola atu kontinua prosesu aprendizajen.
Maski nune’e, nia observa katak prosesu aprendizajen seidauk lao normal, tanba iha loron dahuluk estudante ne’ebé marka prezensa seidauk barak.
Aleinde ezame III períodu, eskola mós prepara hela ezame pasajem klase nian, ne’ebé Komisaun Organizadora sei ezekuta iha 23 Novembru 2026.
Iha parte seluk, Diretór Eskola Sekundária Nobel da Paz, Jeremias P. de Jesus afirma katak, estudante sira besik atu hala’o ezame III períodu.
Nia dehan katak, atividade prosesu ensinu-aprendizajen kontinua lao normal, atu garante estudante sira iha preparasaun adekuada ba ezame.
“Hau hanoin estudante sira presiza kontinua aprende hanesan bai-bain, tanba besik ona ba ezame III períodu,” Jeremias afirma.
Nia husu estudante sira atu marka prezensa loroloron no partisipa ativu iha prosesu aprendizajen tuir disiplina ida-idak.
“Nudar diretór no fundador Eskola Nobel, hau husu estudante sira atu partisipa máximu iha aula, hodi prepara an ba ezame,” nia dehan.
Entretantu, estudante Pedro de Jesus hatete katak, estudante sira hahú fila fali ba eskola depois feriadu, atu kontinua prosesu ensinu-aprendizajen normal.
(jac)
