DÍLI, STLTIMORLESTE.com – Manorin husi Eskola Sekundáriu Jerál 5 de Maio Becora, pontualidade no disiplina iha knaar loron-loron.
Adjuntu Diretór Eskola Sekundária Jerál 5 de Maio Becora, Lobato Mota Pereira, hato’o apelu ne’e ba STL, Kinta (05/11/2026).
Nia subliña katak, pontualidade no disiplina sai valor importante ba manorin sira, nu’udar funsionáriu Estadu ne’ebé iha responsabilidade atu dezenvolve edukasaun.
“Ita hotu-hotu hakarak dezenvolve edukasaun. Tanba ne’e, servidór Estadu tenke tau disiplina no pontualidade iha knaar loroloron,” nia dehan.
Lobato hatutan katak, durante ne’e manorin sira kumpri ona obrigasaun, liuhusi tama eskola sedu no hanorin estudante sira tuir oráriu.
Nia konsidera katak, pontualidade manorin sira nian importante tebes atu garante prosesu ensinu-aprendizajen lao ho di’ak.
Iha fatin seluk, Diretór Eskola Sekundária Jerál 10 Dezembru Comoro, Manuel Verdial, mós afirma katak manorin sira tenke hanorin tuir oráriu no disiplina ida-idak.
Entretantu, Ministra Edukasaun, Dulce de Jesus Soares, enfatiza katak profisaun manorin presiza dedikasaun, pasiénsia no responsabilidade boot.
Nia hateten katak, manorin sira tenke fó atensaun tomak ba estudante sira durante prosesu hanorin iha sala aula.
“Manorin sira tenke iha sala laran durante tempu hanorin tomak. Pontualidade no konfiansa fó ezemplu di’ak ba estudante sira,” nia afirma.
Ministra ne’e mós afirma katak, manorin tenke valoriza profisaun rasik, tanba edukasaun kontribui diretamente ba dezenvolvimentu jerasaun foun.
Nia konsidera katak, profisaun manorin nu’udar profisaun nobre, tanba liuhusi sira nia servisu, estudante sira bele sai sidadaun responsável no proativu iha futuru.
(jac)
