DILI, STLTIMORLESTE.com – Familia boot Suara Timor Lorosae (STL) inklui mos ema rihun ba rihun hakat ba saudozu Eis Prezidente Republika, Francisco Guterres Lu Olo nia rezidensia hodi presta omenajen, no hatoo agradese ba saudozu nia kontribuisaun hodi luta ba rai nee hetan ukun rasik aan.
Familia boot Suara Timor Lorosae (STL) akompanha husi CEO, Salvador Januario Saores ho ekipa hakat ba presta omenajen ba saudozu iha oras tuku 9 dader, tuir orariu neebe mak komisaun organizadora fahe ona, antes hakat ba presta omenajen hahu ho rejistu naran depois kontinua kedas prosesaun ho orasaun, hodi hatoo sentidu kondolensia klean ba aman luta nain nee.
Tuir observasaun neebe STL hetan iha loron Kinta nee (25/06/2026) hahu iha dader familia boot STL inklui ema rihun ba rihun hakat ba Saudozu nia rezidensia hodi presta omenajen ba saudozu, no tuir observasaun neebe hetan, hahu husi loron 23-25 ema wain tebes hakat ba Rezidensia balun lori lilin no koroa ho fita hakerek Deskansa ho Dame Saudozu Lu Olo, no daudaun nee rezidensia saudozu nia nakonu ho aifunan husi laran tama too estrada liur, ida nee nuudar sinal domin no agradese ba saudozu ba nia luta neebe lori rai nee ba hetan ukun rasik aan.
Sidadaun Timor-oan rihun ba rihun husi area hotu-hotu, inklui ofisial governu, veteranu, membru korpu diplomatiku, líder relijiozu, organizasaun sosiedade sivíl, ema ho defisiensia, foin-sae no estudante sira, nomos familia kontinua hakat lao batan-been sira tanis tanba sente lakon aman Heroi ida neebe lakon tebes ona iha mundu.
Sira nia prezensa ho Koroa aifunan reflete klean nakonu ho domin, gratidaun, no respeitu neebe povu Timor fo ba saudozu, tanba sira hatene katak saudozu nuudar aman, eroi Timor nia neebe husik sira sedu deit hodi fila hikas ba iha nain nia kadunan Santo Rohan laek.
Liu husi mensajen solidariedade no kondolensia sira, hametin família enlutada durante tempu susar nee. alende nee sira hakbesik aan ba saudozu hodi husu agradese no obrigado tanba ho sakrifisiu luta husi terus oin oin husi tinan 24 hodi lori rai nee ba hetan ukun rasik aan,
Iha tempu hanesan, sira fo onra ba saudozu Lu Olo nia dedikasaun moris tomak no sakrifísiu sira ba libertasaun Timor-Leste, no mos ninia kompromisu neebe la nakdoko ba pas, demokrasia, unidade nasional, no dezenvolvimentu nasaun nian.
Saudozu nia legadu inspira nafatin jerasaun prezente no aban-bainrua hodi hakat tuir, maske oras nee saudozu lahamutuk ona ho povu maibe nia nia servisu ba nasaun nia kontribuisaun ba luta ba ukun rasik an sei hela ba nafatin iha povu Timor nia fuan no memoria.
Hakmatek iha lalehan aman asuwain Timor Leste nia, hakmatek iha lalehan aman domin nain, ita nia mate husik hela tristeza boot ba familia, povu iha rai ida nee.
(eme)
