DILI, STLTIMORLESTE.com – Fondasi neebe metin ba ema nia moris mak halo tuir Nai Maromak nia liafuan sira neebe hakerek iha evanjelhu.
Lia hirak nee hatoo husi Padre Paul Kerans, SVD ba STL Kinta (25/06/2026) hatete, fondasi neebe metin ba ema nia moris mak rona no halo tuir ninia liafuan sira, Jesus mak fatuk se ema harii nia moris iha Nain, moris nee abut metin hodi tahan anin no laloran sira.
Padre dehan husi refleksaun ba loron ohin foti husi evanjellu Mateus konaba uma rua neebe Jesus deskreve iha ai knanoik, Evanjellu ohin nian mosu hanesan deit, ba observador ida husi liur, bele parese laiha diferensa entre edifísiu rua nee, maibe iha diferensa krusial entre sira, maske la aparente kedas.
Padre dehan ida nee sai aparente deit bainhira anin boot ida mosu. Iha momentu neeba maka sai klaru katak uma rua neebe hanesan nee hamriik iha fondasi neebe diferente tebes. Uma ida tahan anin-boot, enkuantu ida seluk monu. Iha kazu uma rua nee nian, saida maka la haree signifikativu liu duke saida maka haree.
“Pasajen Evanjelhu ida nee hatudu katak buat neebe hanesan bele akontese iha ita-nia moris. Moris rua bele mosu hanesan tebes, maibe, iha realidade, moris ida bele sai vulneravel liu duke ida seluk. Jesus hateten katak fundasaun neebe metin liu ba ita-nia moris maka rona no halo tuir Ninia liafuan. Nia mak fatuk, no se ita harii ita nia moris iha Nia, iha Ninia valor sira no atitude sira neebe maka revela iha ninia liafuan no iha ninia moris, entaun ita-nia moris sei iha abut metin no ita sei bele tahan anin-boot sira neebe maka inevitavel iha ita-nia moris,” dehan Padre.
Tanba nee bibi atan kreda katolika nee husu sarani no ema idak idak nafatin tau fiar no komfiansa tomak iha Jesus, tanba Jesus mak hun no rohan ba moris, bainhira laran metin iha Kristu buat hotu sei lao diak, maibe iha moris hasoru tentasaun no dezafiu oin oin maibe nunka hakiduk tanba abut ba fiar nia metin iha Jesus.
(eme)
