DILI, STLTIMORLESTE.com – Kontrusaun no manutensaun ba infraestrutura estrada nian ho kualidade sai nuudar save prinsipal ba dezenvolvimentu ekonomia, nunee kondisaun estrada sira liu liu iha area rural, presiza tebes hetan prioridade hodi hamoris ekonomia iha rai laran.
Tuir Observador Ekonomia, Eduardo de Oliveira katak, estrada neebe diak bele hamenus osan neebe gasta ba lori sasan, fasilita movimentu produtu lokal, no kria oportunidade negosiu ba komunidade foho sira.
“Ita hatene katak estrada kualidade sai save ba dezenvolvimentu ekonomia, nunee kondisaun estrada presiza hetan prioridade tanba dezafiu boot neebe agrikoltor rural sira hasoru dadaun mak susar lori produtu lokal ba too merkadu nasional tanba kondisaun estrada neebe kotu no aat, liuliu iha tempu udan.Kustu transporte neebe karun mos hamenus rendimentu neebe adekuadu ba komunidade sira,” dehan Eduardo ba STL, Kinta nee (25/06/2026).
Nia dehan, aleinde setor agrikultura, infraestrutura neebe kualidade mos sai nuudar fator determinante hodi dada investimentu setor privadu nian no hanuras potensia turizmu iha munisipiu sira, nunee ekonomia nasional la dezentralizas deit iha kapital Dili.
No Governu labele foka deit ba kontrusaun foun, maibe tenke bazeia mos ba planeamentu orsamentu neebe korresponde ba manutensaun priodika, nunee estrada sira neebe harii ona bele dura ba tempu naruk no fo benefisiu ekonomika neebe sustentavel.
Iha parte ketak Akademista UNTL, Antonio dos Santos hatete, kualidade ba kontrusaun estrada neebe diak sei sai vantajen mos ba kondisaun finanseiru Estadu nian ba tempu naruk, tanba ho nunee Governu la presiza gasta fali orsamentu barak deit hodi fakar ba fatin hanesan tinan tinan, maibe bele aloka fali ba dezenvolvimentu setor importante sira seluk.
(car)
