BAUCAU, STLTIMORLESTE.com – Autoridade Suku Caibada, Postu Administrativu Baucau Vila, Munisipiu Baucau, avalia ona prosesu koutasaun ba implementasaun Programa Nasional Dezenvimentu Suku (PNDS) 2026.
Informasaun nee hatoo husi Xefe Suku Caibada Cosme da Costa Lopes ba STL iha sede Suku Caibada, Kinta (25/06/2026).
“Kona-ba PNDS Agora daudaun ita iha avaliasaun koutasaun ba kompanhia neebe mak karik manan ita implementa ona,” nia dehan.
Autoridade Suku nee informa, planu prioridade Suku Caibada nian ba implementasaun atividade PNDS 2026 siklu 8 mak atu halo reabilitasaun estrada diresuan Aldeia Aurobu ba Suku Bahu, tanba durante nee kondisaun aat iha neebe fo impaktu ba movimentasaun transporte publiku neebe mobiliza komunidade sira nia produtu lokal ba asesu merkadu.
Nia sublina, atividade reabilitasaun estrada nee ho distansia kilometru (Km) 3 ho valor orsamentu rihun US$ 30 resin, iha neebe daudaun parte Suku hahu avalia ba koutasaun husi kompanhia interesadu ba material fabrikadu.
“Entaun ohin ita loke koutasaun kompanhia sira agora iha Suku kompanhia ida neebe manan ita haree ba nia numeru orsamentu kiik liu, nia mak halo estrada nee,” Cosme fundamenta.
Alokasaun POI husi PNDS ba material fabrikadu ho montante orsamentu US$ 4,553.00, iha neebe prosesu sira fo oportunidade ba kompanhia interesadu sira tuir koutasaun.
Koutasaun ba implementasaun PNDS iha Suku Caibada nee kompete husi kompanhia haat (4) mak hanesan Acelda Unipessoal Lda ho valor orsamentu US$ 4,163.43, Cactos Unipessoal Lda US$ 4,255.18, Simples Unipessoal Lda US$ 4,404.93 enkuantu Manudare Unipessoal Lda kompete ho valor US$ 4,454.16, iha neebe kompanhia neebe kompete koutasaun ho valor orsamentu kiik, mak sei responsabilidade ba material fabrikadu ba reabilitasaun estrada ba Aldeia Aurobu nee ho durasaun servisu sei remata antes fulan Dezembru.
Iha sorin seluk, Prezidente Autoridade Munisipiu Baucau, Veneranda Lemos husu Autoridade Suku sira atu implementa programa sira husi Programa Nasional Dezenvimentu Suku (PNDS) tinan 2026 nee, tenke remata antes fulan Dezembru.
“Hau prezisa fo nafatin enfaze ba implementasaun PNDS nian tanba programa PNDS laoa multi anual programa nee anual, entaun nain Xefe Suku sira neebe implementador ba programa ida nee tenke apar ho situasaun ida nee katak, antes de Dezembru programa hotu hotu iha kraik tenke hotu ona,” Veneranda hateten.
Orsamentu neebe Governu liu husi Ministeriu Administrasaun Estatal (MAE) preve ba kada Munisipiu no aloka ba kada Suku implementa programa sira husi PNDS, tuir Suku ida idak nia planu prioridade, iha neebe Suku balu implementa ho projetu bee moos, reabilitasaun estrada, loke estrada foun, konstrui kampu multi funsaun no seluk tan neebe nia objetivu atu benefisiu ba komunidade sira iha baze.
Nunee orsamentu neebe Governu aloka, Autoridade Suku mak nuudar implementador programa no projetu sira iha terrenu, tanba nee tenke aselera prosesu sira implementa no finaliza obra sira antes fulan Dezembru tinan 2026.
“Tanba bainhira kuandu servisu la hotu osan nee la hela fali ba tinan oin, osan nee tenke fila kaixa Jeral do estadu, se osan fila programa kiik oan iha Suku nee la hotu, se ita hein fila fali orsamentu tinan oin nia implementasaun iha kraik estraga,” katak Veneranda.
Entretantu tinan fiskal nee, implementasaun atividade siklu 8 husi Programa Nasional Dezenvimentu Suku (PNDS) iha Munisipiu Baucau hamutuk 79 atividade ho alokasaun valor orsamentu US$ 304,291.42.
(tom)
