BAUCAU, STLTIMORLESTE.com – Projetu reabilitasaun estrada husi Vila Antiga, area Toro, Suku Bahu ba Aldeia Caisidu, Suku Tirilolo no kontinua ba Suku Triloca, Postu Administrativu Baucau Vila, Munisipiu Baucau, sei hahu iha tempu besik.
Prezidente Autoridade Munisipiu Baucau, Veneranda Lemos aprezenta, projetu refere Governu liu husi Ministeriu Planu Investimentu no Estratejiku (MPIE) selebra ona kontratu ho kompanhia Nasional JOVA Construction Unipessoal Lda no Planaltu STAR Unipessoal Lda neebe sei halao servisu reabilitasaun estrada husi area Uaibo Caisidu Suku Tirilolo too area Toro Suku Bahu Postu Baucau Vila no husi area Laho Suku Triloca ba area eskola Maristas.
“Parte kompanhia sira ohin mai informa prosesu administrativa dokumentus nian sira kompleta hotu ona iha Nasional, reabilitasaun estrada nee kontinuasaun estrada Caisidu nian ho total kilometru 11,” hateten Veneranda Lemos ba jornalista sira hafoin remata enkontru ho kompanhia implementador no Autoridade Postu no Suku iha salaun Wewe Baucau Vila, Kinta (25/06/2026).
Nia esplika, projetu reabilitasaun estrada nee hamutuk Km 11, neebe kobre husi area Toro Vila Antiga ba too Uaibo Caisidu ho distansia kilometru (Km) 9 no kontinua ba area Laho Suku Triloca hamutuk Km 3.
Nia sublina, tuir kontratu neebe parte kompanhia rua refere ho Governu liu husi MPIE selebra ho valor orsamentu pur-volta US$ 6 milloes, no projetu reabilitasaun estrada nee nuudar projetu kontinuasaun husi projetu reabilitasaun estrada diresuan Caisidu-Lanud, tanba nee parte kompanhia sira sei hahu nia servisu mobilizasaun material ba terrenu iha tempu badak.
“Komesa semana oin kompanhia bele ona halo mobilizasaun ou kontaktus direitu iha terrenu, husi nee ba oin tinan oin mai ita bele hetan estrada ho diak,”Veneranda akresenta.
Eis deputada iha esperansa boot ba kompanhia implementador rua refere garante sei finaliza tuir kontratu neebe selebra ona, tanba hanesan kompanhia JOVA Construction Unipessoal Lda iha vontade servisu no responsabilidade ba projetu.
Maibe implementasaun projetu reabilitasaun estrada atual nee sei iha komunidade afetadu liu liu iha area Suku Bahu no Caibada, nunee husu komunidade sira atu kopera implementasaun projetu, tanba bainhira estrada diak bele asesu merkadu, saude, edukasaun no seluk tan ho diak.
“Bainhira infraestrutura hanesan estrada diak ita garante buat hotu hotu. Afetadu responsabilidade Governu nian, neebe hau husu komunidade kolabora labele iha impedementu,” Veneranda komenta.
Iha fatin hanesan, Xefe Suku Caibada Cosme da Costa Lopes agradese ba projetu reabilitasaun estrada refere, tanba povu nia halerik Governu kontinua responde, mezmu neineik liu, maibe rezultadu too ona baze.
“Ba Suku haat neebe agora benefisiariu ba estrada nee Autoridade hotu hotu nia esforsu lori povu nia lian, entaun durante ita nia halerik iha ona rezultadu neebe mak fixu,” Cosme komenta.
Autoridade masimu Suku Caibada nee informa, projetu reabilitasaun estrada diresuan husi area servisu reabilitasaun estrada husi area Uaibo Caisidu Suku Tirilolo too area Toro Suku Bahu Postu Baucau Vila, sei afeta mos ba komunidade sira nian uma hela fatin, plantasaun, kios no seluk tan iha Suku Caibada, tanba estrada refere nia diresuan liu husi Suku Caibada, maibe garante sei laiha perturbasaun iha prosesu implementasaun servisu iha terrenu, tanba infraestrutura bazika hanesan estrada parte ida husi ezijesia komunidade nian tenke implementa atu fasilita movimentasaun transporte publiku no privadu.
“Kona-ba afetadu Governu sei tau orsamentu iha neeba atu responde, hau hanoin laiha impedementu, tanba ema hotu hotu nia hakarak hadia estrada,” Cosme argumentu.
Entretantu liga asuntu nee, jornalista sira tenta komfirma nain ba kompanhia JOVA no Planaltu STAR maibe lakohi fo komentariu.
(tom)
