DILI, STLTIMORLESTE.com – Jesus nia hanorin liu husi ai knanoik sira iha evanjelhu nee laos istoria deit, maibe ida nee mak konvite no odamatan misteiru sira reinu Maromak nia.
Kestaun nee hatoo husi Padre Paul Kerans, SVD ba STL, Kinta (23/07/2026) hatete, lian Jesus nia neebe mak hakerek iha evanjelhu mak liafuan nee los hodi lori ema ba dalan los nia, tanba nee ema idak idak buka halo tuir Maromak nia hanorin.
“Mateus 13:10-17 Jesus nia ai knanoik sira iha Evanjellu sira laos istoria deit. Sira mak konvite no odamatan ba misteriu sira reinu Maromak nian. Maibe atu tama iha odamatan sira nee presiza liu fali tilun atu rona ka matan atu haree. Nee presiza fuan neebe prontu atu komprende,” dehan Padre Paul.
Padre dehan ema neebe mak lao hamutuk ho Jesus, maibe bainhira Jesus hatoo mensajen sira nee ho ai knanoik maibe sira la halo tuir Jesus nia liafuan sira nee tanba sira nia fuan toos.
“Ema barak neebe tuir Jesus rona liafuan hanesan iha ai knanoik sira, maibe uitoan deit mak simu duni liafuan sira nee. Tanba sa? Tanba sira nia fuan toos no indiferente. Ema seluk nakloke, haraik aan, no prontu atu komprende klean liutan Jesus nia hanorin iha ai knanoik sira,” dehan Padre.
Bibi Atan Kreda Katolika nee dehan realidade ida nee sei eziste nafatin too ohin loron. Hanesan ema lubun iha Jesus nia tempu, ema barak liu iha moris hodi haree maibe la komprende, rona maibe la rona loloos.
Maibe lia loos konaba moris, domin, no fiar subar iha ema nia oin. So sira neebe buka ho laran tomak maka sei komprende. So sira neebe rona ho sira nia fuan maka sei hetan transformasaun.
“Entaun mai ita loke nafatin ita nia fuan no ita nia klamar alerta nafatin. Mai ita buka lia loos ho haraik aan. No hanoin katak ita hetan bensaun laos deit atu haree ka rona, maibe atu komprende. Nee mak prezente neebe espesial no folin boot tebes,” dehan Pe.
Pe haktuir tan katak, Maromak nia liafuan neebe koalia iha Evanjellu laos iha eskitura sira deit maibe nee implementa iha ita nia moris loron loron tanba nee husu ema idak idak buka halo tuir saida mak Maromak hanorin iha eskritura Maromak nia hodi implementa iha moris loron ba loron iha familia, sosiedade no nasaun.
“Maromak koalia hela ba ita. Ninia ai knanoik sira kontinua eziste, laos deit iha Eskritura sira, maibe mos iha ita-nia moris loron loron nian. Espera katak ita entre sira neebe komprende no hakarak atu muda,” katak Padre.
Nunee mos Padre Rikardus Pasang, SVD hatutan, refleksaun ba loron kinta foti husi (Jer 2:1-3.7-8.12-13; Mt 13:10-17) katak dala barak ema tau liu prioridade ba sasan mundu hodi ignora hanorin Maromak nia.
“Ami husik hela fonte, no kee fali bee dalan neebe la metin. Ami hamrook aumenta ba beibeik, tanba bee mundu nian la too nafatin. Maibe o koalia ho lian-suave/mamar, “Iha Hau mak iha Bee Hun moris.” Iha o nia liras okos ami hamahon-an, iha o nia Naroman ami nia matan nakloke. Labele husik ami nia fuan sai todan, hodi bele rona no haree. Dada ami fila fali, o Nai, hodi hemu husi o nia Bee domin neebe la maran ba nafatin,” katak Padre.
(eme)
