DILI, STLTIMORLESTE.com — Kondisaun estrada rural neebe tahu dodok iha tempu udan difikulta sirkulasaun transporte publiku no privadu, fo impaktu diretu ba movimentu ekonomiku no sosial komunidade nian iha nivel suku no aldeia.
Kondisaun nee halo bee nalihun iha dalan klaran no tahu mahar taka metin sirkulasaun, tanba udan neebe tuun foin daudaun ho intensidade aas. Dalan neebe taka ho tahu dodok halo veíkulu roda rua no roda haat susar atu liu, no bele hamosu asidente tranzitu ka kareta monu ba mota.
Sirkulasaun transporte publiku no privadu tenke lao ho kuidadu boot, no balun tenke sirkula neineik tebes hodi evita veikulu metin iha tahu laran. Kondisaun infrastruktura nee afeta direitamente ba movimentu ekonomiku, liu-liu transporte produtu agrikola husi knua ba merkadu, no mos asesu ba fasilidade edukasaun no saide.
Komunidade no motorista sira neebe uza dalan nee husu ba entidade kompetente, liu-liu Ministeriu Obras Públikas atu foti pasu urjente hodi hadia kondisaun estrada refere hodi fasilita fali sirkulasaun ba populasaun.
Kona-ba kestaun nee, Observador Ekonomia António da Silva haktuir katak, atrazu iha manutensaun estrada rural fo impaktu negativu ba kresimentu ekonomiku lokal, tanba habadak rendimentu toos-nain sira nian no hasae kustu transporte tula sasan ba merkadu.
“Tuir ami nia observasaun direta, haree estrada iha area rural sira nee aat tebes, tanba kuandu estrada aat nafatin, sirkulasaun ekonomika iha nivel suku no aldeia sei la lao ho diak no gasta tempu barak liu iha dalan,” hatete Antônio ba STL, Sesta nee (24/07/2026).
Nia hatutan katak, governu presiza prioritiza orsamentu ba reabilitasaun estrada rural sira nee hodi hametin kaitu ekonomiku husi foho ba sidade, nunee bele dudu dezenvolvimentu neebe hanesan ba populasaun hotu.
Iha fatin ketak, Akademista UNPAZ Silveiro Magno hatete katak, planeamentu infraestrutura neebe ho kualidade no durabillidade aas mak sai xave parseiru ba dezenvolvimentu sustentavel, nunee labele gasta beibeik orsamentu ba manutensaun neebe fila fali iha kada tempu udan.
Entretantu, kada loron publiku kontinua fahe retratu ka video kona-ba kondisaun estrada aat no tahu dodok iha munisipiu sira, liu-liu iha area rural, liu husi midia sosial hanesan Facebook, TikTok no seluk tan, hodi hatoo sira-nia laran susar no hamutuk husu ba governu atu fo atensaun seriu ba estrada sira neebe aat.
(car)
