DILI, STLTIMORLESTE.com – Prezidente Republika (PR), Jose Ramos Horta sente triste bainhira rona novidade artista Portugues Luis hakotu nia peregrinasaun iha mundu, hodi fila hikas ba Nai nia kadunan Santo.
Prezidente Republika liu husi karta sentidu kondolensia neebe STL asesu husi media Prezidensia Republika Sesta (24/07/2026) hatete, ho laran taridu bainhira rona no hatene konaba Luís Represas nia mate, artista português ida neebe notavel liu iha nia jerasaun no belun sinseru no dedikadu Timor Leste nian.
“Iha dekada balu nia laran, Luís Represas tau ninia talentu artístiku no ninia lian nia prestíjiu iha servisu ba kauza boot ida, liberdade no dignidade povu Timor-oan nian. Iha tempu neebe Timor-Leste nafatin iha okupasaun nia okos no sofrimentu ita nia povu nian, dala barak komunidade internasional ninia knananuk Timor sai nuudar símbolu makaas ba solidariedade, esperansa no rezistensia, hamoris konsiensia sira no mobiliza apoiu husi sosiedade portuges no internasional,” dehan PR Horta.
PR Horta dehan, matebian ninia ligasaun ho Timor la remata ho restaurasaun independensia. Iha tinan 2000, nia halo parte iha vizita ofisial husi Prezidente Republika Portugal iha tempu neeba, Jorge Sampaio mai Timor Leste, hodi fahe ho povu momentu ida neebe signifikativu liu iha istoria TL nian.
Artista Luis nafatin mantein amizade metin neebe nia kuda ho Timor Leste no povu Timor.
Ninia mate reprezenta lakon boot ida ba kultura Luzofona, maibe mos ba Timor Leste, iha neebe sei hanoin nafatin nia nuudar artista esepsional no belun loos ba povu. Ninia legadu sei moris nafatin iha ninia muzika, iha memoria koletiva povu timoroan nian, no iha valor sira solidariedade, fraternidade no esperansa nian neebe nia sempre defende.
(eme)
