DILI, STLTIMORLESTE.com – Tribunal Judisial Primeira Instansia Dili (TJPID) iha loron Sesta (24/07/2026) liu husi despaisu ikus ba kazu Scamming Call Centre iha Hera, deside aplika medida Prizaun Preventiva ba arguidu nain 11.
Arguidu sira nee Diresaun Servisu Investigasaun Kriminál (DSIK) asegura no detein iha area Hera Mota Kiik, Aldeia Halidolar, Suku Hera, Postu Administrativu Kristu Rei, iha loron Kuarta (22/07/2026) foin lalais nee.
Hafoin rona tiha arguidu sira, iha despaisu Tribunal nian liu husi Juiza Ana Paula Fonseca, deside aplika Medida Prizaun Preventiva ba arguidu nain 11.
Defeza arguidu sira nian João Serra la konkorda ho despaisu Tribunal nian no nia parte sei halo rekursu ba iha Tribunal Rekursu.
Arguidu sira submete mai iha Tribunal hamutuk nain 11 no husi Ministeriu Publiku neebe reprezenta husi Prokurador Rafael Gusmão no Pedro Batista promove sira ho krime Asosiasaun Kriminoza previstu iha artigu 188, Brankamentus Kapitais previstu iha artigu 313 no Burla Informatika previstu iha artigu 268 husi Kodigu Penal Timor Leste nian.
Antes nee, iha alegasaun Ministeriu Públiku reprezenta husi Pedro Batista no Rafael Gusmão solisita ba Tribunal atu aplika medida Proibisaun Auzensia no Kausaun US$ 5.000, nunee kada arguidu tenke selu osan kausaun nee ho valor US$ 5.000.
Defeza arguidu sira João Serra husu Tribunal atu aplika medida Termu Identidade Rezidensia (TIR). Enkuantu ba kausaun nian Defeza husu atu Tribunal aplika ba nia kliente kada ema ida US$ 1.000.
Prosesu nee prezide husi Juiza Ana Paula Fonseca, Ministeriu Publiku reprezenta husi Prokurador nain rua, arguidu sira hetan asistensia legal husi Advogadu Privadu.
(ter)
