DILI, STLTIMORLESTE.com – Liu husi komunikadu imprensia neebe STL asesu husi media F-FDTL, tuir reprezentante Xefe Estadu Maior FALINTIL–Forsa Defeza Timor Leste (F-FDTL), Atual Xefe Planeamentu F-FDTL, Tenente Koronel Yoseph Taek, ofisialmente taka Workshop kona-bá Intelijensia Artifisiál (IA), neebe realiza iha Salaun Kuartél Jenerál F-FDTL Fatuhada, Dili.
Entretantu workshop ida nee organiza husi Seksaun Jéneru F-FDTL neebe lidera husi Kapitaun Marquita da Cunha, hamutuk ho parseiru internasional sira, hanesan UN Women, Governu Kanada no For All Women and Girls, ho objetivu hasae konhesimentu pesoal F-FDTL konaba utilizasaun Intelijénsia IA atu apoiu avansu iha area Feto, Pas no Seguransa (Women, Peace and Security), liu husi resposta sivil militar ba dezastre natural no manutensaun pas.
Tuir Atual Xefe Planeamentu F-FDTL, Tenente Koronel Yoseph Taek katak, konhesimentu no kapasidade konaba Intelijensia Artifisiál importante tebes atu apoiu dezenvolvimentu institusionál F-FDTL no hasae efisiensia servisu, liu-liu iha area planeamentu, resposta ba emerjensia no kooperasaun sivil militar.
Antes enseramentu workshop nee, atividade ida nee loke ofisialmente husi Xefe Estadu Maior FALINTIL–Forsa Defeza Timor Leste, Brigadeiru Jenerál José da Costa Soares “Trix”.
(jen)
