DILI, STLTIMORLESTE.com – Relasiona ho komemora loron Independensia Republika Indonezia ba dala 81, Freedom Faithnet Global (FFG) neebe lidera husi Maria Carlos (Mami) servisu hamutuk ho Banco de Sangue Hospital Nasional Guido Valadares (HNGV) Dili, realiza asaun doasaun raan hodi ajuda ema seluk neebe presiza raan, tanba ran turuk ida bele salva ema nia vida.
Atividade asaun doasaun raan neebe mobiliza ema besik atus rua (200) husi nasaun Timor Leste, Indonezia, Malazia, Filipina no nasaun sira seluk halao iha Timor Plaza, Dili, Domingu (26/7/2026).
Koordenadora FFG iha Timor Leste, Maria Carlos neebe akompania husi Alexandrina Martins hatete ba STL katak FFG servisu hamutuk ho Banku de Sangue HNGV Dili halao atividade doasaun raan ba etape segundu nian iha tinan 2026 neebe mobiliza ema husi nasaun Timor Leste, Malazia, Filipina No. nasaun sira seluk neebe voluntarimente oferese sira nia raan ba ema seluk neebe presiza raan.
Xefe Komunidade FLOBAMORA (Flores, Sumba, Alor no Timor) iha Timor Leste nee, informa katak, atividade doasaun raan ida nee, atu komemora loron Independensia Republika Indonezia ba dala 81 (17 Agostu 1945-17 Agostu 2026).
“Atividade asaun doasaun raan neebe ami realiza ohin loron nee hanesan atividade umanitaria neebe ami halo atu ajuda ema seluk neebe presiza raan, tan ran turuk ida bele salva ema nia vida. Atividade sosial nee ami halo tinan ida dala tolu no agora dala rua ona. Atividade nee ami halo kada fulan tolu ka fulan haat dala ida. Ema barak mak voluntariumente oferese sira nia ran ba ema neebe presiza raan,” dehan Maria Carlos.
Nia dehan, ema neebe voluntariamente oferese nia ran liu husi asaun doasaun raan nee la hatene nia raan nee ba se, maibe raan turuk ida ajuda salva ema seluk nia moris. Nunee mos raan sira neebe kolleta husi mobilizasaun FFG servisu hamutuk ho Banco de Sangue HNGV Dili, bele ajuda fali mos doador sira nia familia. Tanba nee, nia husu ba ema hotu atu halo doasaun raan voluntariamente hodi bele ajuda ka salva ema seluk nia vida iha ospital.
Maria Carlos dehan, atividade asaun doasaun raan nee hetan apoiu husi Banco de Sangue, KBRI Dili, Pertamina, Banku Mandiri, BRI, Timor Plaza, FFG, Sylvia Dili, GBI Rock, Caravelha, Jatim Food, Cini Farmacia, Mie Doben, ANL, Moris Living Water, Air Timor no sel-seluk.
“Atividade ida nee realiza atu komemora Loron Independénsia Repúblika Indonézia ba dala 81. Tanba ne’e, ami organiza asaun doasaun raan. Atividade ida ne’e hetan apoiu husi parte barak, hanesan emprezáriu sira iha Timor-Leste, emprezáriu Indonézia ne’ebé hela iha ne’e, no mós entidade emprezarial sira hanesan, Pertamina, BRI, Telkomsel no Banku Mandiri. Sira hotu fó apoiu ba ami tanba atu organiza atividade ida ne’e presiza rekursu no apoiu barak,” hatete Maria Carlos.
Entretantu, Jerente Filial Banku Mandiri Dili, Dolly R. Sinaga dehan, Banku Mandiri Dili hakarak hakarak partisipa ativamente iha atividade sosiál sira hanesan nee tanba fó benefísiu ba komunidade.
“Hau rasik mós partisipa iha doasaun raan nee. Ami hein katak ema hotu-hotu iha papel atu fó impaktu positivu ba ema seluk. Tanba ne’e, hau mós hakarak atu Bank Mandiri bele fó benefísiu no fó impaktu di’ak liu husi atividade sira neebé ami halo,” hatete Dolly Sinaga.
Nia mos dehan, iha fulan Agostu nia laran, Banku Mandiri Dili mos sei komemora ninia loron moris (aniversariu) no sei halao atividade hanesan bakti sosial iha suku no munisipiu sira, inklui mos atividade doasaun raan. Ba atividade doasaun raan, Banku Mandiri servisu hamutuk ho ospital sentral no entidade saude sira iha Timor Leste atu asegura fornesimentu raan ba pasiente sira neebé presiza.
Iha fatin hanesan, Pendeta Binsar Simangunsong, MTH, husi Igreja ROCK Akadiruhun, hatete husi nia parte mos apresia tebes atividade doasaun raan nee, tanba ho raan turuk ida bele salva ema nia moris. Nia espera atividade umanitaria hanesan nee tenke halao bei-beik, tanba ema barak mak presiza tulun husi maluk sira neebe ho voluntariamente fo tulun ba maluk sira neebe presiza.
“Ami sempre apoiu ba atividade sosial sira neebe halao iha Timor Leste. Atividade ida nee realiza atu komemora loron Independensia Republika Indonezia ba dala 81. Atividade ida nee mos hetan apoiu husi parte barak,” katak nia.
Nia hato’o agradese ba parte hotu-hotu neebe fo sira nia apoiu hodi realiza atividade doasaun raan nee.
Iha sorin seluk, Alexandrina Martins husi FFG hatete atividade doasaun raan nee importante tebes, tanba liuhusi doasaun raan bele ajuda maluk sira neebé presiza raan. Nia dehan, objetivu doasaun raan nee mos bele hametin lasu sira maun-alin nian no parentesku nian hodi fó ho ksolok no domin.
Nunee mos Xefe Departamentu Banco de Sangue HNGV Dili, dr. Alex Mendonca hatete atu responde ba preokupasaun kona-ba raan, husi sira nia parte halo ligasaun ho grupu oi-oin halo atividade asaun doasaun raan kada fulan tolu (3) ka fulan haat (4) dala ida.
“Husi ami nia servisu kolleta raan liuhosi doasaun raan hanesan nee, estoke raan limitadu liu mak typu raan AB, tanba ba typu raan ida nee ema limitadu liu,” dehan nia.
Objetivu hosi doasaun ran ne’e atu ajuda komunidade ne’ebé presiza raan, tanba ran turuk ida bele ajuda no salva ema nia vida no doasaun raan ne’e nakloke ba komunidade ne’ebé hakarak bele hakbesik hodi oferese traan uruk ida.
Nia mos dehan, asaun ida ne’e pozitivu tebes tanba bele ajuda pasiente ne’ebé presiza iha ospitál nasionál. Maibe, ema barak mak seidauk iha konsensia atu ajuda ema seluk neebe presiza raan.
Iha sorin seluk, Pearl Amores Leonardo husi Filipina ba STL hatete ninia prezensa iha atividade doasaun raan nee atu voluntariumente oferese nia raan ba ema seluk neebe presiza raan. Nia dehan, atividade hanesan nee importante tebes atu ajuda ba ema neebe presiza raan no sira neebe la iha kbiit atu sosa raan.
“Hau hakarak hola parte iha atividade doasaun raan nee, tanba raan turuk ida bele salva ema nia vida moris. Husu ba sira neebe iha fuan no domin atu ajuda ema seluk, mai ita hamutuk oferese raan ba ema neebe presiza raan. Ida-ne’e ajuda boot ida, liuliu ba ema sira ne’ebé laiha priviléjiu ne’ebé labele selu raan. Entaun favór ida, favór ida mai,” dehan nia.
Liafuan hanesan hato’o mos husi Cia husi nasaun Malazia no Elly husi Indonezia. Sira partisipa iha atividade doasaun raan nee hodi voluntariumente oferese sira nia raan ba ema seluk neebe presiza raan. Cia no Elly dala barak ona oferese sira nia raan liuhosi asaun doasaun raan neebe organiza husi FFG.
Madre husi Kongregasaun KYM, Yosefia hatete, sira partisipa iha asaun doasaun raan nee ho objetivu atu ajuda ema seluk neebe presiza raan.
“Dala barak ona hau oferese hau nia raan ba ema seluk neebe presiza raan. Tanba nee, bainhira iha atividade doasaun raan hanesan nee, hau sempre partisipa no espera katak raan neebe ami oferese nee bele ajuda ema seluk neebe presiza raan,” dehan Madre Yosefia.
(mik)
