DILI, STLTIMORLESTE.com – Inan aman no familia nia papel importante hodi tau matan no eduka oan sira hahu kedas iha familia mak sai ba liur.
Lia hirak nee Feto Feto Potensia, Maria Amaral ba STL iha nia knaar Fatin Kaikoli, Segunda nee (27/07/2026) hatete, papel inan aman importante tebes hodi tau matan ba oan sira hahu husi uma laran antes sai ba liur.
“Ohin loron ho mundu teknolojia asesu buat barak, iha buat diak iha mos buat aat, no oan barak neebe haluha kultura hadomi no respeita inan aman, balun la respeita malu hodi trata, tolok malu, atu muda oan sira nia atitude sira, papel inan aman nia importante hahu husi uma laran antes sai ba liur, eskola nomos igreja,” katak Maria Amaral.
Dala barak oan sira inklina aan iha atividade balun neebe ladun fo benefisiu ba aan no nasaun, hanesan ransu livre, balun inklina aan iha droga no krime sira, tanba falta kontrola husi inan aman rasik.
“Inan aman nia responsabilidade boot los, oan kalan toba presiza haree, no kalan la tama uma buka hatene oan nia paradeiru iha neebe? No fila eskola tarde buka tuir, no bainhira oan sira koalia liafuan neebe la merese iha publiku inan aman fo hanoin, no oan derepente hetan telefone folin karun ida maske inan aman la fo osan ba buka hatene telefone nee hetan husi neebe? Faan buat ruma mak hetan ka oinsa buka hatene, “ katak nia.
Nunee mos Komisaria Ezekutiva no Sekretaria Iha Eskuteru Nasional, Filomena Barros dos Reis hatutan, hodi oan ba dalan los, tuir lo-loos edukasaun nee hahu kedas husi uma laran, husi inan aman mak sai.
“Hanesan organizasaun eskuteru ami ida nee sempre lao no joven sira neebe mak involve nee iha lei ho prinsipiu neebe mak sempre orienta liu liu moris nia oinsa etika moral, oinsa ida nee lao, maibe la falta mos husi inan aman tenke fo orientasaun fo hanoin nafatin konaba valores prinsipal nuudar humana nee tenke respeita mutua respeita ema boot sira, ida nee importante,” dehan Filomena.
Nia hatutan, laos respeita ema boot hakruuk deit lae, maibe edukasaun sivika nee importante, no husi parte eskuteru nia ho labarik kiik sira iha seksaun oin oin hodi hanorin oinsa respeita ida nee hodi hanorin ba labarik sira mak inklina aan iha eskuteru, no ba uma sira tenke pratika nafatin tanba semana semana mai bainhira hasoru malu sempre husu tuir saida mak sira halo iha uma.
“Bainhira ami halo enkontru ho inan aman, no sira dehan sira kontente tanba oan sira iha uma hatudu hahalok neebe diak,” katak nia.
Nia hatete oan barak neebe lakon moral iha familia no sosiedade tanba inan aman rasik husik oan sira hodi inklina aan atividade seluk, no inan amak ladun tau matan ba sira ho masimu lahatene oan sira ba neebe? Tama uma sa oras no toba iha neebe ida nee mos impkatu ida.
Nunee mos Padre Rikardus Pasang, SVD hatete, Maromak nia liafuan neebe hanorin ba ema mak respeita no hadomi malu, liu husi atitude neebe halo iha moris loron ba loron nia.
Tanba nee ema neebe mak halo tuir Maromak nia hanorin sira nee, oan respeita inan aman, no respeita ema neebe idade liu nia, no buka hadook aan hahalok krime ida nee mak Maromak nia oan neebe Maromak hadomi.
Bibi Atan Kreda Katolika nee husu sarani ida idak bainhira koalia liafuan neebe naksalak ba malu buka husu deskulpa ba malu, no husu deskulpa inan aman, no inan aman neebe koalia liafuan neebe ladiak buka husu perdaun, no inan aman nafatin reza ba oan sira, no oan sira reza ba inan aman.
(eme)
