DILI, STLTIMORLESTE.com — Polisia no servisu investigasaun sira iha obrigasaun atu halo investigasaun klean hodi buka hatene rede ilegal neebe iha ligasaun ho sidadaun estranjeiru nain 62 nia detensaun iha area Kampung Baru, Suku Comoro, Munisupiu Dili.
Operasaun konjunta nee hamosu indísiu makaas katak, sidadaun estranjeiru sira nee envolve direta iha operasaun jogu online ilegal.
Observador Politika, Jaime Magno Xavier salienta katak, PNTL, Servisu Migrasaun no DSIK nia asaun nuudar mudansa pozitivu, maibe atensaun tenke tau ba buka dalan hodi sobu rede boot.
“Investigasaun tenke lao klean liu tan hodi hatene se loos mak iha xefe boot sira neebe finansia ka organiza jogu ilegal ne’e. Labele husu deit ema kiik mak sai vítima ba lei,” dehan Jaime ba STL iha Kaikoli, Dili, Segunda (28/07/2026).
Tuir nia, kazu hanesan nee fo impaktu negativu ba seguransa publika no bele estraga imajen nasaun nian, ”Se autoridade sira la foti medida rigorozu no transparente hodi kombate rede krime transnasional iha Timor Leste,” hatete Observador Politika nee.
Iha sorin seluk, Akademista UNDIL, Adriano da Costa haktuir katak, autoridade kompetente sira presiza hatudu transparensia total iha kazu nee hodi evita duvida iha komunidade nia leet, no hametin konfiansa publika ba instituisaun justisa nian iha Timor Leste.
Entretantu, operasaun nee nuudar parte husi esforsu Governu no autoridade kompetente sira atu kombate krime transnasional, inklui online scam call center no atividade ilegal seluk neebe bele ameasa seguransa no estabilidade iha Timor Leste. Tuir informasaun sidadaun sira neebe kapturadu, daudaun nee iha hela prosesu investigasaun hodi verifika sira nia identidade, estatutu imigrasaun no alegasaun envolvimentu iha rede jogu online ilegal. Aleinde nee, ekipa konjunta mos prende evidensia sira hanesan telefone, laptop, no ekipamentu internet hanesan Starlink.
(car)
