DILI, STLTIMORLESTE.com – Komando Polísia Nasional Timor Leste (PNTL) Munisipiu Dili, liu husi Diresaun Tranzitu Munisípiu Dili hamutuk ho Ekipa Konjunta Sekretaria Estadu Asuntu Toponímia no Organizasaun Urbana (SEATOU), Diresaun Nasional Transportes Terrestres (DNTT) sira halo operasaun konjunta ba transporte neebe para la tuir regras tranzitu nian, sira asegura motorizada 25.
Komandante Tranzitu no Rodaviária Munisípiu Dili, Superintendente Asistente Polísia, Delfim da Silva dehan, operasaun nee halao iha Sabadu kalan iha area Ponte BJ. Habibie too iha Culu-Hun.
Nia tenik, operasaun nee haree ba kareta no motor sira neebe para la tuir regras, nunee ekipa husi DNTT sobu sai plat kareta no motor balu asegura ba iha DNTT nia edifisiu, balun asegura iha Komando Munisípiu Dili tanba espasu la too.
“Operasaun hahu husi ponte BJ Habibie too Kuluhun, motor ho kareta neebe para iha trotoar leten sira nee, kareta ita sobu plat, motor nain laiha ita sobu deit plat no motor nain iha ita lori mai iha Komando Munisípiu Dili,” hatete Komandante Tranzitu no Rodoviária Munisípiu Dili, Superintendente Asistente Polísia, Delfim da Silva ba jornalista sira iha Komando Munisípiu Dili, Tersa nee (27/07/2026).
Nia deklara, transporte hirak nee Sabadu kalan ekipa halo operasaun no asegura motor ho xapa matrikula nee ohin hahu nia distribuisaun ba transporte nain sira bainhira kumpri ona prosesu administrasaun no selu ona koima iha banku.
Nia hatutan, ba transporte hirak neebe DNTT asegura sei hein pasa reseitas hodi mai aprezenta iha Komando PNTL Munisipiu Dili, atu nunee bele ba selu iha banku hafoin lori hikas resibu ba aprezenta iha Komando mak foin entrega fali motor no sapa matríkula ba nain. “Tanba operasaun nee ita sei kontinuan too bairu laran,” nia koalia.
Superintendente Asistente Polísia nee dehan, durante operasaun n’e ekipa la asegura kareta maibé prende deit xapa matríkula.
“Motor sira neebe nain iha ita sobu deit nia plat no motor neebe nain laiha ita lori motor sira nee balu para iha Komando Munisípiu Dili no balun iha DNTT,” nia hatoo.
Nia informa, motor neebe asegura iha Komando PNTL Munisipiu Dili total hamutuk 25 nomós Xapa matrikula lubuk ida, nunee bainhira motor nain selu tiha imprensaun iha banku mak sira bele foti fali motor.
Delfim esplika, kona-ba selu koima ba kareta no motor, depende ba nia grau, bainhira xapa matríkula laiha kontra sinais tranzitu no dokumentu laiha nia multa ba koima la hanesan.
“Sapa matrikula selu US$ 45, kontra sinain selu US$ 45, motor para sala selu US$ 45, motor espelu laiha selu USz$ 45, maibe depende ba grau iha operasaun nee, operasaun ba mak motor sapa matrikula, espelu no dokumentu motor laiha selu barak, ezemplu motor sapa matrikula laiha selu US$ 60,” katak nia.
Nia mos apela ba komunidade sira neebe iha kareta no motor tenke para iha nia fatin, labele para iha fatin publiku okupa estrada no kontra sinais tranzitu.
Komandante Tranzitu no Rodoviária Munisípiu Dili nee afirma, operasaun iha Sabadu kalan nee SEATOU lidera deit ekipa, tanba antes nee iha semana kotuk realiza ona enkontru hodi forma ekipa halo operasaun, nunee iha operasaun nee halao akompanha husi Segundu Komandante Munisípiu Dili, Komandante Operasaun, Komandante Tranzitu nomos Komandante Ekipa UEP.
Iha fatin ketak, Motorista Juliana Ximenes informa, motor para iha BJ Habibie, Tranzitu foti mai liu iha Komando PNTL Munisipiu Dili, tanba para iha estrada ibun.
“Hau nia motor Polisia Tranzitu prende iha BJ Habibie nian, tanba para iha estrada publiku, tanba nee ohin mai foti surat banku nia para ba selu, depois lori fali surat banku nee mai mak foti motor,” nia afirma.
(jen)
