DILI, STLTIMORLESTE.com – Ajensia Promosaun Investimentu no Esportasaun I.P (Tradeinvest Timor-Leste) realiza workshop ho tema “Asesu ba Merkadu Xina”, atu partilha informasaun ba empreza sira konaba rekezitus oinsa atu esporta produtu ba iha merkadu Xina.
Lia hirak nee hatoo Director of External Relations and Marketing Tradeinvest Timor Leste, Roberto Lai ba jornalista sira iha Maubara Room Timor Plaza, Tersa (28/07/2026).
“Iha workshop ho tema Asesu ba Merkadu Xina, ami hamutuk ho kolaborasaun lubuk ida hakarak fahe no partilha informasaun neebe mak importante tebes ba ita nia emprezariu, ita nia eksportador sira hodi bele hatene oituan konaba rekezitus oinsa atu esporta produtu ba merkadu Xina nomos atu hola produtu balun husi merkadu Xina atu importa no eksporta hodi apoiu ba sira nia negosiu,” dehan nia.
Nomos oinsa atu halo rejistrasaun ba iha jenderal administration alfandega Xineza, hodi nunee fasilita emprezariu sira para iha ligasaun ba malu hodi bele fo oportunidade oinsa atu asesu ba iha merkadu Xina nian.
Fo apresiasaun ba Embaixada TL iha Xina, kooperasaun diak ho Komersiu iha Xina Beijing nomos parseiru alfandega Xina sira, tempu atu fahe mos informasaun ba Empreza sira, estudante TL iha Xina ba kolaborasaun diak ho Trade Invest hodi bele realiza workshop nee.
“Ita haree husi demostrasaun ida nee, ita hare importansia husi ita nia diaspora iha rai liur, estudante iha Xina vontade diak para bele mos buka informasaun fahe ba ami entidade governu ho nunee ohin loron ita hamutuk bele asesu ba informasaun,” dehan nian.
Tanba liu husi workshop nee bele hetan infomasaun oituan konba regulamentu importasaun no regulamentu atu asesu ba merkadu livre Xina nian, depois prosesu rejistu kompanhia ba iha Alfandega ho nunee bele fo dalan ba imi para asesu merkadu Xina nomos iha seasaun informasaun konaba empreza oinsa atu importa makina kafe ka ekipamentus balanse husi Xina mai TL.
Tradeinvest TL nia kompotensia hetan mandatu husi governu atu promove fasilita monitoriza no fo advokasia ba investimentu privadu no esportasaun nunee ami nia perioridade atu suporta fo apoiu tomak ba eksportador sira liu-liu ba empreza mikro, mediu no pekenas iha TL, nunee sira bele asesu ba merkadu internasional no hasae konektividade atu melhora ita nia konhesimentu ba rekezitus eksportasaun sira no liga Empreza sira ba oportunidade iha merkadu global.
(joa)
