DILI, STLTIMORLESTE.com – Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) desmantela tan sidadaun estranjeiru nain 30, kompostu husi sidadaun Xineza nain 29 no nain 1 husi nasaun Laos.
Portavoz Komando PNTL, Superintendente Xefe Polísia João Belo dos Reis hatete, iha Sabadu kalan (26/07/2026) halo desmantelasaun Scam Call Center ida iha Hotel WL Word, area Krisu Rei, iha operasaun nee detekta ema hamutuk 30 kompostu husi sidadaun Xineza nain 29 no nain 1 husi Laos (Laos PDR).
“Agora daudaun sira nain hira nee iha sela detensaun parte Comoro nian no oras ida ita sei aprezenta ba Tribunal,” hatete Portavoz Komando PNTL, Superintendente Xefe Polísia João Belo dos Reis ba jornalista sira liu husi konferensia imprensia iha Komando Jeral PNTL Caicoli, Dili, Tersa (28/07/2026).
Aleinde nee, hori kalan mos ekipa Servisu Migrasaun hamutuk ho DSIK halo tan operasaun iha parte Comoro, neebe deskonfia fatin halo Scam Call Centre.
“Ita kaptura ona sidadaun estranjeriu hamutuk nain 62 neebe kompostu husi sidadaun Indonezia nain 28, Sidadaun Xina hamutuk 33 no Sidadaun India nain 1,” nia esplika.
Nia informa, sidadaun hirak nee daudaun DSIK halo hela prosesu identifikasaun no iha tempu badak sei aprezenta ba iha Ministériu Públiku.
Tanba nee Komando Jerál liu husi Portavoz PNTL apela ba komunidade sira katak, Seguransa no Defeza Timor Leste demostra ona ba komunidade, ita nia determinasaun atu proteje ita nia sobrania nasional ordem publika no bens estar Timor nian.
Nia deklara, atividade online Scam Call Center sai ona forma modernu sufistikadu husi kriminidade neebe esplora konfiansa, espransa no dala barak vulnerabilidade ba ema nia.
“Vitima husi fraude nee lakon sira nia ekonomia, sira nia diginidade, iha kazu balu sira mos saude mental,” nia hatutan.
PNTL mos la permite ita nia rai hanesan plataforma ba atividade freleratoriu ida nee, aleinde nee PNTL kontinua kompremitidu fo misaun atu servi no proteje sidadaun sira.
Mensajen ba rede krime internasional, Timor Leste laos rai neebe mak seguru ba sira atu halo operasaun ba atividade krime ida nee.
“Ema neebe mak tenta atu uza teritoriu no tasi ba espasu dijital ba sira nia atividade ilisitu sira, ita sei halo resposta neebe mak firmi, kornenada no aplikavel ho ita nia forsa seguransa sira,” nia tenik.
Nia koalia, PNTL mos apela ba sidadaun sira atu mantein vizilante hodi halo denunsia kualker atividade neebe mak suspeita ba iha indikasaun krime nian iha eskudra neebe mak besik, no nunka atu trasmite dadus pesoal kodigu banku nian ka osan ba ema neebe mak la hatene ou ema neebe mak sira la konhese iha internet.
Iha biban nee, Portavoz nee mos agradese ba instiruisaun parseiru sira hanesan Servisu Imigrasaun, Servisu Informasaun, Autoridade Maritima, FALINTIL-Forsa Defeza Timor Leste (F-FDTL), ba servisu diak tomak no koordenasaun neebe halo ona hodi responde ba krime transnasional sira iha rai laran.
(jen)
