DILI, STLTIMORLESTE.com – Branch Manager Meratus iha Timor Leste, Rommy Marco Karundeng hakotu iis ho idade 51 iha Ospital Dili Medical Center (DMC), Tersa (28/7/2026) madrugada, tanba moras komplikadu.
Sidadaun Indonezia iha Timor Leste hato’o sentidu kondolensia klean ba familia enlutada liuhusi grupu WatsApp Forum WNI Timor Leste nomos grupu WatsApp komunidade hanesan, Flobamora, Batak Diak Los, Maluku, Santa Elisabeth Taibessi, K3TL no sel-seluk tan.
Matebian nuudar mos Xefe Komunidade K3TL neebe ativu tebes iha atividade Oikumene no atividade sosial neebe organiza husi komunidade husi Indonezia iha Timor Leste.
Xefe Komunidade Flobamora iha Timor Leste, Maria Carlos (Mami) lori komunidade Flobamora nia naran hato’o sentidu kondolensia klean ba familia enlutada neebe hasoru susar ida nee.
“Ami fiar katak maktoban Rommy Marco Karundeng oras ne’e deskansa ho hakmatek iha Aman Lalehan nia liman,” dehan Maria Carlos.
Nia dehan, ho fiar no domin, membru tomak Komunidade Flobamora iha TL hato’o sentidu kondolénsia klean ba matebian Rommy Marco Karundeng nuudar Xefe Komunidade K3TL neebe Aman Maromak bolu ona hodi fila hikas ba Aman Maromak nia kadunan lalehan iha loron 28 fulan Jullu tinan 2026.
“Ksolok ba sira ne’ebé mate ba Na’i… atu sira bele deskansa hosi sira nia serbisu.” (Wahyu, 14:13).
“Obrigado ba ita-boot nia serbisu ezemplár, serbisu maka’as, no kompaixaun ba ema seluk. Ita-boot nia prezensa signifika buat barak ba ami no komunidade iha Timor Leste. Adeus, Maromak nia atan fiel. Ami reza atu família ne’ebé husik hela sei nakonu ho dame no kmaan husi Maromak Kbiit-Na’in,” nia hakotu.
Tuir observasaun STL iha mate uma iha Farol, familia sira serbisu makaas okupadu trata papel sira, inklui sertidaun mate no rejistu formalin iha HNGV Dili. Sira mós trata hela dokumentu sira iha Embaixada Indonézia iha Dili hodi fasilita transporte mate-isin husi Dili ba Surabaya.
“Bainhira dokumentu sira kompletu ona, mate-isin sei transporta ba Surabaya iha Kuarta (29 jullu 2026)”.
Matebian Rommy Marco Karundeng, moris iha Surabaya, 16 Marsu 1975 no hakotu iis iha Dili, 28 Jullu 2026 ho idade 51. Adeus… maun Rommy Marco Karundeng.
(mik).
