DILI, STLTIMORLESTE.com – Manorin mak tenke prepara jerasaun foun ho kualidade diak iha futuru oin mai, no presiza iha konhesimentu neebe diak.
Lia hirak nee hatoo husi Diretor Eskola Sekundariu Jeral 10 dezembru Comoro, Manuel Verdial ba STL iha nia knaar fatin Comoro, Kinta nee (20/08/2026).
“Sistema edukasaun lao kapas los ona, maibe depende fali ba iha konsiensia nasional ema hotu-hotu neebe mak bele forma duni ita nian estudantes sira katak, sai estudantes meebe ho kualidare diak. Nee duni ita hotu tenke iha konsiensia katak, nee ema seluk hanorin nomos hatudu dalan ba ita hodi motiva ita,” nia dehan.
Manuel dehan, kualidade edukasaun nee lao ohin nee ninia sistema lao kapas ona, tanba edukasaun laos determina ohin, maibe kontinua reflete bebeik, kualidade neebe diak ba futuru tenke reflete bebeik, liu-liu ba lideransa, inan aman no estudante sira, husu manorin sira halao knaar nee tenke tau importansia.
“Ita nian manorin sira tenke lee globalizasaun neebe mudansa agora daudaun mosu iha ita nian, nee duni ita nian manorin sira mak sei forma estudantes sira neebe ho kualidade diak iha futuru oin mai, tanba uluk mos ema forma ita,” katak nia.
Manuel dehan, papel manorin nian mak atu prepara jerasaun neebe iha kualidade, maibe husu estudantes sira tenke iha konsiensia ida katak, bainhira mai eskola tenke ativu iha aprendizajen, tanba estudantes balun la partisipa aula, too ezame mak mai deit, nee labele, nuudar jerasaun foun presiza esforsu aan estuda.
“Ita nian manorin sira nee hanorin tuir orariu no planu aula neebe prepara ona, tanba ita nian estudantes sira mak sai jerasaun kontinuador ba futuru, tanba nasaun nee presiza ema matenek para bele dezenvolve rai nee ba oin, tanba estudantes labele too ezame mak mai eskola,” nia afirma.
Iha sorin seluk, fundador eskola Nobel da Paz, Jeremias P. de Jesus hatete, papel manorin nian mak molok halao aprendizajen, sira prepara uluk planu de aula nomos fo kapasitasaun lingua nian ba profesores sira hodi bele transmiti ba estudante sira, hanesan fundador ba eskola nee fo hanoin ba estudante sira estuda, nasaun nee presiza ema neebe matenek.
“Nuudar fundador ba eskola ida nee, hau sempre fo hatene ba estudantes sira, imi mai eskola nee atu aprende buat ruma husi profesor sira, tanba ami prontu atu eduka imi no prepara imi sai jerasaun neebe kualidade, maibe balun mai la tama sala iha liur deit, nee atu fo sala ba se,” nia informa.
Jeremias husu nafatin apoiu husi inan aman sira, fo hanoin ba oan sira mai iha eskola presiza partisipa iha aula, laos iha liur deit, maibe nee laos estudantes hotu, balun deit, dala ruma balun too ezame mak mai.
Lucio Maia de Jesus hanesan estudante husi Eskola Sekundariu Nobel da Paz dehan, nuudar estudante tenke iha prinsipiu mai eskola tuir aula, laos hamriik rame-rame iha liur too oras fila uma, nee atu aprende saida.
“Ita estudantes la tuir aula nee ita mak lakon materia, tanba aprebduzajen lao nafatin, ita mak joven ida, presiza prepara aan liu husi estuda, aprende buat ruma no lee barak, esforsu aan no iha vontade atu estuda,” nia haktuir.
(jac)
