DILI, STLTIMORLESTE.com – Institutu Nasionál Kombate HIV-SIDA (INCIDA) halo sensibilizasaun iha Aldeia Ramelau, tanba kazu HIV iha Dili besik ona rihun rua no maioria husi relasaun seksual.
Tuir Prezidente INCIDA, Daniel Marcal katak, transmisaun barak liu akontese liu husi relasaun seksuál ne’ebé livre iha kapital.
“Ita koalia kona-ba HIV, Dili mak númeru makaas liu, atu besik ona rihun rua. Kazu sira nee maioria transmite liu husi relasaun seksuál,” hatete Prezidente INCIDA, Daniel Marcal ba jornalista sira iha fatin Aldeia Ramelau, Suku Comoro, Postu Administrativu Dom Alexo, Munisipiu Dili, Tersa (24/08/2026).
Nia preokupa katak laiha kontrolu ba atividade livre bele halo transmisaun sae beibeik. Nunee INCIDA koordena ho autoridade lokal sira atu tau atensaun ba asuntu nee.
“Sei ita la haree agora, ba tinan hira mai tan HIV iha Munisípiu Dili sei sae makaas liu. Tanba joven sira namora, inan-aman la kontrola, no moris hamutuk la deskonfia,” nia esplika.
Daniel Marcal mos informa katak, INCIDA iha ona koordenasaun ho autoridade relevante sira kona-ba proposta atu kria lei obrigatóriu teste ran masál ba sidadaun hotu.
Iha parte seluk, Xefe Suku Comoro, Elijio Jose Marsal, hatete programa nee importante tebes ba joven sira. Tinan kotuk sira simu ona no agora kontinua hetan informasaun husi INCIDA.
“Sensibilizasaun nee presiza joven sira nia prezensa atu rona rasik kona-ba saida maka moras HIV/SIDA. Hau hanesan autoridade lokal sempre suporta atividade sira nee,” nia dehan.
INCIDA kompromete sei kontinua halo sensibilizasaun iha kapitál Dili hodi prevene joven sira husi virus HIV.
(jen)
