MAUBISSE, STLTIMORLESTE.com – Konsellu Imprensa (KI) realiza formasaun konaba hakerek editorial piece (tajuk) ka pesa editorial hodi kapasita jornalista ka editor sira atu iha kapasidade hakerek analitiku ba asuntu saida deit neebe mosu iha sosiedade.
Formasaun loron tolu husi loron Tersa (25/8/2026) to’o loron Kinta (27/8/2026) ho formador husi jornalista senior ANTARA, Aloysius Arena Ariwibowo ne’e halao iha Hotel SARA iha Maubisse, Postu Administrativu Maubise, Munisipiu Ainaro.
Partisipante sira aranka husi Dili ba Maubisse, hafoin Direitur Executivu KI, Antonio Dias akompania husi Direitór Diresaun Analiza no Dezenvolvimentu Media, Alberico da Costa no Responsabel ba formasaun, Maria Bibel, ofisialmente husik sira ba Maubisse iha Salaun Enkontru KI, Kintal Boot, Dili, Segunda (24/8/2026).
“Formasaun nee importante tebes ba jornalista ka editor sira iha kapasidade hakerek analitiku ba asuntu saida deit neebe mosu iha sosiedade. Ida nee oportunidade diak ba ita boot sira atu hatene klean maneira oinsa hakerek editorial iha ida-idak nia media,” dehan Antonio Dias.
Entretantu, Diretor Diresaun Analiza no Dezenvolvimentu Media, Alberico da Costa, neebe espesialmente loke formasaun nee iha Salaun Hotel SARA, Maubisse, hateten katak KI realiza formasaun ida nee atu kapasita jornalista ka editor sira atu iha kapasidade hakerek analitiku liu husi hakerek editorial iha ida-idak nia media.
“Tuir KI nia analiza durante nee media estatal ka media pribadu menus liu hakerek editorial. Tanba nee, liu husi treinamentu nee, jornalista ka editor sira bele iha kapasidade atu hakerek editorial ho diak. Ami akompanha durante ne’e hakerek editorial. Ita ladun hare’e iha publikasaun media nian, media balun iha editorial, maibe ami hare’e kuase media online sira laiha editorial. Entaun ida ne’e mos razaun ida oinsa atu ita fo formasaun ba asuntu sira hanesan ne’e,” tenik nia.
Tuir nia, partisipante sira neebe tuir treinamentu nee mai husi media STL, GMN, Timor Post, RTTL. EP, TVE-T, Media Demokrasia, Gardamor, Radio Liberdade Dili, Radio Loriku Lian, RCC, Radio Liberdade, media mudansa, Jornal Independente, News-viptv.com, diligenteonline.com, loluwari.tl, media onetimor, Lafaek News no Sapnewstl.com.
Nia mos dehan katak, editorial ne’e parte husi jornalizmu tanba ne’e buat ne’ebe analitiku no presiza ema ne’ebe iha abilidade hakerek, tanba buat ida editorial ne’e, editor ho xefe redasaun mak hakerek
“Hau espekta ba ita boot sira katak aproveita didiak oportunidade ida nee, tanba editorial ne’e laos buat fasil ida. Ita aprende neneik-neneik to’o iha nivel nebe bele ona hakerek ho diak,” katak nia.
Nunee mos Formador, Aloysius Arena Ariwibowo hateten, iha loron primeiru nia fo materia importante tolu relasiona ho hakerek editorial piece (tajuk), mak fo konhesementu kona ba definisaun editorial, karakterístika mídia nian hodi halo polítika sira (politika redasaun) no karakterístika mídia radio, televisaun no media printing.
“Hakerek editorial iha media nee importante tebes, oinsa media iha opiniaun neebe bele influensia sosiedade. Ita hatene katak sosiedade ohin loron nian nakonu ho informasaun ne’ebé bele halo sira konfuzaun. Tanba ne’e, buka hakerek editoriál atu prevene sira atu labele konfuzaun ho notísia falsu sira,” katak senior jornalista ANTARA nee.
Aleinde simu materia husi formador, iha mos diskusaun enter formador ho partisipante sira relasiona ho hakerek editorial.
Tuir planu, materia ba loron segundu nian mak “Jestaun Ekipa Redasaun, Etika no Planementu Kontiudu”.
(mik)
