DILI, STLTIMORLESTE.com – Deputadu FRETILIN, Antoninho Doutel Sarmento, hateten katak rede mafia iha Timor-Leste kontinua halo operasaun hodi fase no sirkula osan foer ho livre, hodi hamosu duvida kona-ba efikásia lei no sistema kontrolu finanseiru.
Tuir nia avaliasaun, prosesu kaer no lori suspeitu sira tama ba kadeia la hatudu ona efeitu fraku ne’ebé metin, tanba dala barak ema hirak ne’ebé naran tama ona iha liña investigasaun bele halai sai fali ho fasil no la hetan sansaun ne’ebé justu.
“Tama mai rai ne’e ho di’ak los, Polísia kaer no tau iha kadeia. Mas, agora sira halai sai fali ho di’ak los,” nia haktuir ho lian kritiku ba STL, Kuarta nee (26/08/2026).
Deputada FRETILIN ne’e alerta katak, situasaun ida ne’e hatudu sinál ne’ebé fó impaktu negativu ba konfiansa públika.
Nia subliña katak bainhira sistema justisa no seguransa la hatudu rigor, implikasaun mak autoridade estadu nian bele monu no lakon ninia integridade perante públiku.
Kritika ne’e mosu tuir Deputadu nee nu’udar reflesaun ba preokupasaun sosiál ne’ebé boot liután kona-ba oinsá lei no ordem tenke aplika ho la’ós de’it ba sidadaun ki’ik sira, maibé mós ba kazu krime branku kapitál ne’ebé ameasa estabilidade ekonomiku no moris di’ak povu nian iha rai laran.
Iha parte ketak observadór polítika, João da Costa, haktuir katak deklarasaun ne’ebé hato’o husi Deputada Bankada FRETILIN ne’e refleta preokupasaun ne’ebé loloos husi sosiedade sivil no públiku konaba efetividade instituisaun justisa nian iha Timor-Leste.
Nia hatutan katak, kazu krime ekonomiku presiza atensaun seriu hodi nune’e, labele hamosu deskonfiansa husi populasaun ba kapasidade estadu nian iha kombate korrupsaun no krime transnasionál.
“Situasaun ne’e ita presiza mós atensaun urjente husi entidade hotu hodi garantidu katak prosesu investigasaun no julgamentu la’o ho transparante, hodi nune’e labele hamosu hanoin sala katak lei bale de’it ba ema balun ne’ebé iha podér.”dehan nia.
Entretantu, akademista UNPAZ, Edmundo Soares, hatutan katak sistema justisa tenke hatudu independénsia ne’ebé loos, hodi nune’e sidadaun hotu bele sente katak lei aplikadu ho justu ba ema hotu la ho diskriminasaun.
(car)
