DILI, STLTIMORLESTE.com Tribunal Judisial Primeira Instánsia Dili (TJPID) iha Kuarta nee hala’o prosesu sumáriu ba arguidu na’in neen (6), ne’ebé detein husi ekipa konjunta kompostu husi KAK, Patrimóniu Estadu, Diresaun Nasionál Transporte Terrestre, Komisaun Funsaun Públika, Inspesaun Jerál Estadu no Polísia Tránzitu, tanba uza veíkulu Estadu la tuir regra.
Arguidu na’in 6 ho inisiál MP, AdS, AMT, NdSM, RPM no RG, submete ba prosesu sumáriu no Ministériu Públiku (MP) akuza sira ho krime Pekulatu de Uzu, ne’ebé previstu iha Artigu 296 Kódigu Penál Timor Leste.
Iha sala julgamentu, Juiz Turnu José Escurial rona deklarasaun husi arguidu sira. Iha sira nia deklarasaun, arguidu na’in neen konfesa ba faktu sira, inklui uza veíkulu Estadu, maibé la iha guia da marcha.
Hafoin rona deklarasaun arguidu sira, Tribunal husu Ministériu Públiku no parte defeza atu hato’o alegasaun.
Ministériu Públiku, reprezenta husi Prokuradór João Marques, deklara katak arguidu sira konfesa ba faktu sira no konsidera katak prova dokumentál sira ne’ebé iha autos hetan konfirmasaun husi arguidu sira.
MP konsidera faktu sira provadu no husu Tribunal atu deklara akuzasaun provadu no aplika pena apropriada tuir medida pena ne’ebé lei determina.
Enkuantu ne’e, defeza, reprezenta husi Manuel Amaral, deklara katak arguidu sira konfesa ba faktu sira no veíkulu ne’ebé uza pertense ba Estadu, maibé uza la tuir finalidade ne’ebé determina.
Defeza husu Tribunal atu konsidera sirkunstánsia sira ne’ebé iha no aplika pena prizaun fulan neen to’o tinan ida, maibé suspende nia ezekusaun durante tinan rua.
Advogada Elisabeth Lopez, ne’ebé reprezenta arguidu RPM, mós deklara katak nia klienti konfesa ba faktu sira, kolabora ho ekipa konjunta no ida-ne’e mak primeira vez nia hasoru prosesu iha Tribunal. Tanba ne’e, defeza husu atu pena prizaun troka ho pena multa.
Hafoin rona deklarasaun arguidu sira no alegasaun husi parte sira, Juiz deside valida detensaun no determina objetu sira ne’ebé apreende atu fó fila ba instituisaun ida-idak hodi kontinua uza ba finalidade servisu.
Juiz mós deside fó liberdade ba arguidu sira husi sela no adia prosesu ba segunda-feira atu rona desizaun husi Tribunal.
Prosesu sumáriu ne’e prezide husi Juiz José Escurial, Ministériu Públiku reprezenta husi Prokuradór João Marques, enkuantu arguidu na’in neen hetan asisténsia legál husi Defensór Públiku no advogadu privadu.
(ter)
