DILI, STLTIMORLESTE.com – Komité Revizaun Polítika (KRP) analiza proposta orsamentu APORTIL ba 2027 hamutuk US$ 4.499.210, iha Ministériu Finansas, Dili.
Komité Revizaun Polítika lidera hosi Primeiru Ministru Kay Rala Xanana Gusmão, kontinua analiza Orsamentu Jerál Estadu (OJE) tinan 2027, inklui proposta orsamentu Autoridade Portuáriu Timor-Leste, Institutu Públiku (APORTIL, I.P.).
Reuniaun da-5 ne’e hala’o iha Salaun Auditorium Ministériu Finansas, Aitarak-Laran, Dili, tersa-feira (25/08/2026), atu analiza no diskute orsamentu no prioridade APORTIL ba tinan 2027.
Prezidente APORTIL, I.P., José de Oliveira Leong, hateten katak instituisaun ne’e presiza atensaun liután hodi bele responde ba nesesidade no atividade sira iha Portu Dili.
Tuir aprezentasaun APORTIL, proposta orsamentu ba tinan 2027 hamutuk US$4.499.210, ho alokasaun US$1.580.389 ba Saláriu no Vensimentu no US$2.917.821 ba Bens no Serbisu.
Enkuantu ezekusaun OJE APORTIL to’o finál fulan Jullu 2026 atinji 46% hosi total alokasaun US$ 4.482.508. Hosi montante ne’e, US$ 1.580.389 aloka ba Saláriu no Vensimentu no US$ 2.902.119 ba Bens no Serbisu.
APORTIL mos iha free balance hamutuk US$ 1.401.297, enkuantu reseita hosi Janeiru to’o Jullu 2026 hamutuk US$ 641.822,54.
Ba reseita tinan 2025, APORTIL rejista hamutuk US$ 1.717.244,23, ne’ebé mai hosi operasaun ro Berlian Ramelau no Nakroma.
Ministra Finansas, Santina José Rodrigues F. Viegas Cardoso, hateten katak Ministériu Finansas sei tau atensaun ba nesesidade APORTIL, liuliu atu suporta atividade iha Portu Dili.
Preparasaun OJE 2027 hala’o tuir aprosimasaun foun ne’ebé liga planu anuál no proposta orsamentál ho prioridade nasionál, Programa Governu, Planu Estratéjiku Dezenvolvimentu 2011–2030 no limite gastu Estadu.
KRP ba OJE 2027 lidera hosi Primeiru-Ministru Kay Rala Xanana Gusmão, ho membru sira inklui Visi-Primeiru-Ministru Francisco Kalbuadi Lay no Mariano Assanami Sabino, Ministra Finansas Santina José Rodrigues F. Viegas Cardoso, Ministru Obras Públikas Samuel Marçal, Ministru Planeamentu no Investimentu Estratéjiku Gastão Francisco de Sousa, Vise-Ministra Finansas Regina de Jesus, Sekretária Estadu Igualdade Elvina de Sousa Carvalho, no reprezentantes hosi Komisaun Funsaun Públika no ajénsia autónoma sira.
(jos)
