DILI, STLTIMORLESTE.com – Dezafiu ne’ebé eskola sira iha kapital hasoru mak kona-ba pontualidade manorin sira nian, inklui ambiente eskola ne’ebé balun seidauk moos.
Superintendente Edukasaun Munisípiu Dili, Cesarina C. Guterres, hato’o informasaun ne’e ba STL iha nia knaar fatin, Kuarta (26/08/2026).
“Dezafiu mak hau hateten ona dala barak, manorin sira too tarde iha eskola, la pontual, no ambiente eskola hanesan hariis-fatin, fo’er. Maibé depois inspetor sira fó auto no pasa hela mensajen iha livru vizita eskola sira, no sempre lao tuir. Ami iha total inspetor hamutuk 12, pre-eskolar nain 3, EB 7 no ESG no Tek. Vok. 2,” nia afirma.
Nia dehan, rezultadu monitorizasaun husi inspetor no inspetora sira kada loron, liu husi atividade rutina sei rejista iha livru vizita eskola. Bainhira remata atividade monitorizasaun, inspektor sira sei pasa mensajen bazeia ba rezultadu observasaun, tantu rezultadu positivu ka dezvantajen ruma.
“Se iha desvantejen, sei observa fila-fali iha loron, semana ka fulan tuir mai, atu haree eskola hadia buat ruma ka nafatin hanesan deit. Maibé durante ne’e, eskola sira sempre koopera no tau atensaun ba mensajen sira ne’ebé ita pasa iha livru vizita ba eskola sira,” nia esplika.
Tuir nia, inspetor eskolar sira kada loron hala’o sira nia knar atu haree eskola sira lao ho diak, liuliu eskola sira ne’ebé lokaliza iha Munisípiu Dili. Monitorizasaun ne’e inklui eskola pre-eskolar, ensinu baziku, ensinu sekundáriu no ensinu tékniku vokasionál.
Iha parte seluk, Direitor Eskola Sekundária Jerál no 4 de Setembru Balide, Sergio A. da Cruz, dehan professores sira mai eskola sedu atu hala’o prosesu ensinu-aprendizajen ba estudantes.
Nia hatete, bainhira profesor ida moras ka iha asuntu seluk ne’ebé halo nia la bele tama eskola, professor ne’e tenke informa ba parte eskola atu bele hatene.
“Ita iha regras mos ba ita-nia manorin sira, oinsá hanorin tuir oras no oráriu ba kada disiplina ne’ebé iha ona. Maibé bainhira ita-nia professor sira moras ka iha asuntu seluk ruma, sira informa mai parte eskola atu bele hatene,” dehan nia.
Entretantu estudante, Deolindo Maia hatete, durante ne’e profesores sira tama hanorin iha sala tuir oráriu ne’ebé iha. Tanba ne’e, kada loron estudantes sira ba eskola sedu, tanba matéria balun professores sira tama sedu iha sala.
“Hau hanoin durante ne’e professor sira tama hanorin iha sala tuir oráriu ne’ebé iha. Nune’e, kada loron estudantes sira ba sedu eskola, tanba matéria balun professor sira tama sedu iha sala, no matéria balun iha oras segundu,” nia afirma.
Nune’e mos Diretor ESJ 10 de Dezembru Comoro, Manuel Verdial hatete, profesores sira kumpri oras hanorin no kada loron mai eskola atu hala’o prosesu aprendizajen ba estudantes.
Nia esplika katak eskola ne’e hala’o atividade ensinu iha meudia, tanba iha oras dader estudantes husi Ensinu Baziku Central (EBC) mak uza fatin eskola.
(jac)
