BAUCAU, STLTIMORLESTE.com – Autoridade Munisípal Baucau husu estudante sira atu kontinua aprende, komprende direitu no responsabilidade hodi hatudu edukasaun no moral diak hahú husi uma laran to’o iha sosiedade.
Sekretaria Munisípal Asuntu Sosiais no Organizasaun Komunitária, Maria Celestina hateten, iha era teknolojia ohin loron, estudante sira iha direitu atu asesu ba teknolojia, maibé tenke uza ho responsabilidade no la haluha estuda inklui halao interasaun ho ema seluk liu husu atetude respeita.
“Hanesan inan, dala barak ita infrenta iha moris loroloron nian, oan sira barak ita koalia la rona, barak liu kolega diak fali ho telefone. Nee ita boot sira nia direitu, maibé haree direitu ne’ebé diak liu tuir ita nia Konstituisaun,” Maria Celestina dehan iha salaun Soi Mali Vila Nova Baucau, Kuarta (26/08/2026).
Nia hateten katak edukasaun laos deit kona-ba eskola no matéria, maibé mós inklui komportamentu, respeitu no responsabilidade estudante sira bainhira iha espasu públiku.
Nia husu inan-aman no komunidade atu hamutuk ho profesór sira hanorin no orienta labarik sira, liuliu kona-ba maneira koalia no respeita ema seluk.
“Dala barak ita ba iha dalan públiku, estudante sira la dun koñese ninia aan. La presiza boot, maibé oinsá imi nia hasae? Hasai netik ‘Bondia’, ‘Boatarde’, hanesan inan-aman kontente, tanba nee iha edukasaun husi uma laran kedas sai mai liur,” nia hateten.
Maria Celestina mós konsidera katak komportamentu estudante sira iha dalan no iha espasu públiku reflete edukasaun ne’ebé sira hetan husi família no eskola.
“Profesór sira sempre hanorin, maibé atende diak liu fali nia kolega sira. Entaun ema boot sira ne’ebé tuur no lao hela iha dalan, imi nunka hasee. Tanba nee mak hato’o ba alin sira hanesan inan ida hakarak oan sira tane domin ne’ebé inan fó ba oan sira liu husi ita boot sira nia simplisidade,” nia dehan.
Nia subliña katak hametin moral no respeitu tenke hahú husi família, tanba hahalok diak ne’ebé estudante sira hatudu iha sosiedade sei sai parte importante ba futuru nasaun.
“Bainhira imi lao iha dalan ninin, hatudu imi nia domin,” Maria Celestina Viegas enkoraja estudante sira.
(tom)
