DILI, STLTIMORLESTE.com — Gabinete Apoiu Sosiedade Civil (GASC) reafirma apoiu ba Fundasaun Alola hodi kombate malnutrisaun no hasa’e nutrisaun feto no labarik iha Timor-Leste.
GASC reafirma kompromisu atu kontinua apoia organizasaun sosiedade sivil iha esforsu kombate malnutrisaun, liuliu ba feto no labarik.
Koordenador GASC, Joaquim da Costa Freitas, hatete malnutrisaun sai fator importante ba dezenvolvimentu Timor-Leste tanba dadus estatístika hatudu katak problema nutrisaun sei aas.
Nia hatete Governu, liuhosi GASC ne’ebé tutela iha Gabinete Vise-Primeiru-Ministru, kada tinan aloka orsamentu hodi estabelese parseria ho organizasaun sosiedade sivil.
“Papel GASC tutela iha Gabinete Vise-Primeiru-Ministru kontinua tau orsamentu tinan-tinan hodi estabelese parseria ho sosiedade sivil,” dehan Joaquim ba jornalista depois abertura Kolokiu Nasional ho tema “Importánsia Nutrisaun ba Dezenvolvimentu Feto no Labarik iha Timor-Leste”, ne’ebé organiza husi Fundasaun Alola iha Salaun Igreja Nossa Senhora Imaculada da Conceição, Balide, Dili, Kinta (03/09/2026).
Joaquim hatete, iha tinan ida-ne’e GASC fó apoiu ba organizasaun sosiedade sivil no kongregasaun hamutuk 197, la’ós Fundasaun Alola de’it.
Kona-ba montante apoiu ba Fundasaun Alola, Joaquim dehan nia la konsege lembra ho loos, maibé nia estima montante iha ordem US$4.000 resin, no husu atu verifika tan númeru ne’e.
Nia espera Fundasaun Alola bele uza apoiu ne’ebé simu ho diak no implementa programa sira ho kualidade, atu parseria bele kontinua iha futuru.
Diretora Ezekutiva Fundasaun Alola, Maria Guterres, hatete kolokiu ne’e organiza ho objetivu hasa’e konsiénsia públika kona-ba importánsia nutrisaun ba kresimentu no saúde feto no labarik.
Nia hatete kolokiu mos buka hametin parseria entre entidades relevantes atu buka solusaun ba situasaun nutrisaun, liuliu prevene no kombate malnutrisaun iha Timor-Leste.
Maria afirma Fundasaun Alola kontinua komprometidu iha área nutrisaun, liuliu nutrisaun inan no oan, maski númeru malnutrisaun tun ona iha períodu ikus.
“Fundasaun Alola iha programa fó-han ba bebé no labarik ki’ik, inklui apoiu ba Ministériu Saúde iha kapasitasaun pesoál saúde no apoiu ba komunidade hodi hasa’e konsiénsia kona-ba pratika fó-hahan lokal ne’ebé diak,” dehan Maria.
Nia esplika, bebé sira presiza simu susuben eskluzivu to’o fulan neen. Depois fulan neen, inan sira bele hahú fó hahan komplementár akompaña ho susuben inan to’o tinan rua.
Depois tama idade hahan família, labarik sira tenke simu hahan ho kualidade no kuantidade ne’ebé apropriadu atu suporta sira-nia kresimentu no dezenvolvimentu.
(dom)
