DILI, STLTIMORLESTE.com — Advogadu privadu Octavio Cardozo sei aprezenta rekursu kontra medida koasaun ba arguidu nain lima envolve iha kazu baku membru.
Arguidu lima ne’e ho inisiál NDS, JIFR, ERF, NMf no MC, hetan medida aprezentasaun periódika iha Ministériu Públiku fulan ida dala ida, tuir desizaun tribunál.
Prosesu ne’e prezide husi juíza Ersilia de Jesus, Ministériu Públiku reprezenta husi prokuradór Bartolomeo de Araujo, no defeza reprezenta husi advogadu privadu Octavio Cardozo.
Ministériu Públiku promove krime obstrusaun ba autoridade públika, bazeia ba indikasaun forte kona-ba envolvimentu arguidu sira, no husu investigasaun kle’an liután.
Advogadu Octavio Cardozo hateten katak, defeza sei mantein pozisaun kona-ba nesesidade investigasaun, maibé sei kontesta medida koasaun ne’ebé tribunál aplika.
“Iha sirkunstánsia balu, haree ba tempu no direitu arguidu sira nian ba liberdade, defeza sei aprezenta rekursu kontra despaisu tribunál nian,” dehan Cardozo.
Nia esplika katak, rekursu sei aprezenta ba tribunál rekursu, ho razaun atu buka alterasaun ba medida koasaun, ne’ebé nia konsidera relasiona ho direitu liberdade, tuir Konstituisaun RDTL.
Tuir observasaun STL, arguidu nain lima lori ba tribunál ho roupa detidu. Depois tribunál foti desizaun, sira tenke aprezenta an iha Ministériu Públiku fulan ida dala ida.
(ter)
