DÍLI, STLTIMORLESTE.com – Prezidente Tribunal Rekursu, Afonso Carmona afirma, Konsellu Superior Majistradu Judisial (KSMJ) hahú funsiona fali, atu rezolve problema sira iha setór justisa.
Prezidente Tribunal Rekursu, Afonso Carmona ko’alia ba jornalista sira iha Kaikoli, Kinta-feira (29/10/2026), no afirma katak Konsellu Judisiáriu hahú hala’o fali atividade, depois de períodu ne’ebé iha preokupasaun kona-ba nia funsionamentu.
“Konsellu funsiona, kestaun problema sira ne’ebé mosu sei rezolve tuir kompeténsia konsellu nian,” Afonso Carmona dehan.
Nia esplika katak, seidauk bele fó informasaun kona-ba rezultadu reuniaun, tanba membru sira foin hasoru malu. Nia mós temi katak deliberasaun sira tenke rai segredu to’o desizaun sai ofisiál no publika iha Jornal da República.
Carmona afirma katak objetivu importante mak asegura públiku nia konfiansa ba setór justisa, liuhosi funsionamentu Konsellu Judisiáriu no rezolusaun problema sira tuir lei.
Kona-ba juízes ne’ebé transfere ba tribunál munisipál, maibé seidauk hahú servisu iha fatin foun, Carmona hateten katak konsellu hahú analiza asuntu sira-ne’e atu buka solusaun.
Nia mós husu atu fó apoiu ba tribunál sira, no afirma katak problema ne’ebé mosu tenke hetan solusaun liuhosi mekanizmu institusionál.
Carmona hateten katak, iha planu atu organiza no distribui juízes ba tribunál sira iha munisípiu, atu rezolve problema transferénsia no asegura servisu judisiáriu lao di’ak.
Nia temi mós katak iha prosesu nomeasaun juízes ba Tribunal Rekursu, Tribunál Supremu no tribunál sira iha baze. Tuir nia, objetivu mak rezolve asuntu sira-ne’e iha fulan Dezembru.
Iha estrutura judisiária foun ne’e, Carmona temi distribuisaun juízes nain haat ba Tribunál Supremu, nain sia ba Tribunal Rekursu no nain 29 ba tribunál sira iha baze. Juízes nain 29 ne’e sei fahe ba kolektivu sia.
Nia mós esplika katak, tuir regra, ema ne’ebé halo rekursu kontra desizaun tenke sita Prezidente Konsellu atu fó resposta. Kona-ba transferénsia juízes, nia afirma katak desizaun sira ne’e iha fundamentu, no administradór juízes sei aprezenta relatóriu kona-ba implementasaun.
Prezidente Tribunal Rekursu afirma katak, reuniaun dahuluk ne’e sei sai etapa preparatória atu analiza planu no define asaun sira ba oin, tuir kompeténsia Konsellu Judisiáriu.
Iha sorin seluk, akademiku Sebastião dos Santos konsidera katak Konsellu Judisiáriu tenke funsiona ho di’ak atu superviziona servisu juízes no buka solusaun ba problema sira iha setór judisiáriu.
“Hanoin konsellu tenke funsiona ho di’ak, atu buka solusaun ba preokupasaun juízes sira nian,” nia dehan.
Nia aumenta katak, iha tempu ne’e, públiku preokupa ho servisu tribunál nian. Tanba ne’e, nia hein katak konsellu bele foti medida apropriada atu rezolve kestaun sira ne’ebé afeta funsionamentu sistema judisiáriu.
(ter)
