DILI, STLTIMORLESTE.com — Governu kontinua buka solusaun ba konstrusaun Igreja Aimutin, ne’ebé besik 70% tama iha “lampu kuning”.
Koordenador Gabinete Apoiu Sosiedade Civil (GASS), Joaquim da Costa Freitas, hatete solusaun ba konstrusaun igreja ne’e bele hetan iha semana ida ka rua.
Joaquim dehan, Governu kontinua buka dalan atu rezolve dezafiu tekniku ne’ebé impede kontinuidade konstrusaun Igreja Aimutin.
GASS halo ona diskusaun ho Kardinal, Padre Parokia Aimutin no parte relevante sira.
Diskusaun ne’e inklui Agência de Desenvolvimento Nacional (ADN), atu avalia dezafiu tekniku no determina solusaun apropriadu.
“Mais 70% iha “lampu kuning”. Hein semana ida ka rua, bele iha novidade kona-ba kontinuidade,” dehan nia.
Joaquim hatete, asuntu tekniku tenke bazeia ba realidade no faktu, la’ós deit promesa politika.
Nia dehan, intervensaun Governu tenke asegura rezultadu efetivu no responde ba dezafiu konstrusaun.
“Politikus bele halo promesa, maibé parte tekniku tenke haree realidade no faktu, atu intervensaun bele efetivu,” katak nia.
Joaquim esplika, projetu Igreja Aimutin hahú durante Governu VI no kontinua iha Governu VII no VIII.
Iha Governu VIII, responsabilidade ba asuntu ne’e muda, no agora Governu IX diskute fali konstrusaun igreja.
Nia afirma, Governu IX iha komitmentu atu buka dalan rezolve asuntu ne’e.
Maibé, nia hatete desizaun final presiza liu hosi prosesu tekniku no administrativu.
Tuir Joaquim, depois funeral Bispu sira nian iha 10 Setembru, sei iha enkontru ho lideransa Igreja.
Enkontru ne’e sei hato’o pozisaun Governu kona-ba kontinuidade obras Igreja Aimutin.
Nia mos dehan, Vise-Primeiru-Ministru sei haruka karta ba Bispu Dili kona-ba responsabilidade Diocese Dili.
Karta ne’e sei relasiona ho kontinuidade prosesu konstrusaun Igreja Aimutin.
Iha sorin seluk, sarani Parokia Aimutin, Sonia dos Reis, husu Governu no Dioseze aselera konstrusaun.
Sonia dehan, komunidade kontinua halo misa iha kapela, tanba igreja prinsipál seidauk remata.
“Nudar sarani, ami hakarak igreja ne’e hotu lalais, para bele tuir misa iha igreja laran,” nia hatutan.
Sarani Santino Magalhães mos husu Governu no Dioseze finaliza konstrusaun lalais.
Nia dehan, konstrusaun kleur ona, no sarani sira sei halo misa iha liur.
(dom)
