BAUCAU, STLTIMORLESTE.com – Estrada nasionál diresaun Baucau-Lautém enfrenta deteriorasaun grave iha área baliza entre Suku Buruma no Suku Caibada Macasa’e, Postu Administrativu Baucau Vila, Munisípiu Baucau.
Xefe Suku Buruma, Liborio dos Santos Freitas, hateten katak kondisaun refere afeta ba estrada ne’e hahú iha fulan Jullu 2026, kuaze estrada monu ho distansia metru 50 no hetan kedas apoiu voluntáriu liuhusi ateru ki’ik husi kompanhia lokal balu, maibé iha loron 02-03 Setembru ne’e enfrenta hikas deteriorasaun grave, iha ne’ebé difikulta movimentasaun transporte públiku no privadu diresaun Baucau–Lautém, inklui Laga, Baguia, Quelicai Antigu, Matebian no Quelicai.
“Loron rua ikus ne’e komesa tán book aan estrada nia kondisaun tun. Agora fó interompe oituan ho movimentu transporte iha ne’e,” hateten Liborio dos Santos Freitas ba STL, iha fatin estrada monu entre baliza Suku Buruma no Caibada Macasa’e, Kinta (03/09/2026).
Liborio esplika katak, hafoin problema ne’e mosu, autoridade lokál informa ona ba Servisu Munisípal Obras Públikas Baucau. Tékniku sira to’o ona iha fatin hare’e no levanta dadus kona-ba kondisaun estrada.
Maibé, to’o agora reabilitasaun seidauk hala’o, maski problema ne’e kontinua ameasa kondisaun estrada no movimentasaun komunidade nian liuhusi estrada refere.
Autoridade lokál mós hateten katak, iha dalan alternativu ba transporte públiku atu liuhusi diresaun Buruma–Docóbere’e-Suku Caibada Macasa’e, mosu iha Suku Tirilolo Postu Baucau Vila, maibé dalan ne’e mós iha kondisaun suvida maka’as no klo’ot, iha ne’ebé konsidera fó impaktu ba movimentasaun.
“Tanba ne’e ami husu para Obras Públikas Munisípiu buka maneira oinsá bele rezolve imediata, labele impede movimentu iha ne’e,” Liborio rekomenda.
Iha fatin akontese, pasajeiru transporte públiku bus diresaun Dili–Lautém, Orlando Ornai, relata katak kondisaun estrada ne’e fó impaktu direta ba movimentasaun transporte públiku no privadu.
Tanba estrada monu sai estreitu no difisil ba karreta ki’ik sira atu liu. Situasaun ne’e dala ruma obriga veíkulu sira hein, hodi hamosu engrafamentu iha fatin refere.
“Dalan ne’e mosu trafiku entaun ami pasiensia hein. Ami husi Dili atu ba Lautém, maibé tan de’it dala hanesan ne’e ami hein ona kuaze 30 minutu,” Orlando informa
Orlando husu Governu, liuhusi Ministériu Obras Públikas (MOP), atu hare’e lalais estrada refere no halo reabilitasaun antes kondisaun ne’e sai todan liután.
“Ha’u husu ba parte Governu, liuliu Obras Públikas, atu hare’e ita nia dalan ne’e, sé bele karik hadia fali, tanba iha tempu oituan ne’e difikulta ami nia movimentu,” nia husu
Tuir informasaun ne’ebé antes ne’e STL rekoilla husi Tékniku Destakadu Ministériu Obras Públikas iha Munisípiu Baucau katak, estrada refere monu tanba kauza husi sendimentasaun, estrutura rai mamar no momentu implementasaun projetu reabilitasaun estrada refere la konstrui moru protesaun, nunee afeta estrada monu ho distánsia metru 50 to’o 100.
Kondisaun ne’e parte Tékniku Destakadu Ministériu Obras Publikas iha Munisipiu Baucau relata ona ba Nasionál atu halo reabilitasaun, maibe sei hein prosesu topografia molok implementa servisu iha terrenu.
(tom)
