DILI, STLTIMORLESTE.com – To’o agora, Eskola Sekundária Jerál Públiku 12 Novembru Becora seidauk iha laboratóriu ba siénsia ezata, inklui ekipamentu prátika ne’ebé sufisiente ba estudante sira.
Informasaun ne’e hato’o husi Adjunto Diretór Eskola Sekundária Jerál Públiku 12 Novembru Becora, Fernando Xavier, ba STL iha Sesta (04/09/2026).
Fernando hateten, falta laboratóriu ba siénsia ezata no fasilidade seluk sai nu’udar dezafiu ida ba eskola, tanba estudante sira labele hala’o atividade prátika diretamente iha laboratóriu.
“Ami nia difikuldade ne’ebé ami hasoru iha ami nia eskola mak, to’o agora ami seidauk iha laboratóriu ba siénsia ezata. Laboratóriu IT no rede internet ba estudante sira mos seidauk sufisiente. Laboratóriu ba siénsia ezata to’o agora laiha, nune’e ami nia estudante sira labele hala’o prátika,” dehan Fernando.
Tuir Fernando, eskola iha laboratóriu IT, maibé ekipamentu ne’e seidauk sufisiente atu kobre estudante sira hotu. Eskola iha de’it komputadór 20 unidade, enkuantu númeru estudante to’o besik rihun ida.
Tanba limitasaun komputadór, estudante sira tenke fahe malu iha grupu, ho estudante 20-20, bainhira hala’o atividade prátika IT.
“Ho ekipamentu prátika ne’ebé to’o agora seidauk sufisiente ba estudante sira atu hala’o sira nia atividade prátika iha eskola. Nune’e mos, laboratóriu ba siénsia ezata to’o agora laiha. Oinsá mak ami nia estudante sira bele hala’o prátika?” nia informa.
(jac)
