DILI, STLTIMORLESTE.com – Ministériu Solidariedade Sosial no Inkluzaun (MSSI) no Autoridade Região Administrativa Espesiál Oecusse Ambeno (RAEOA) ohin asina kontratu atu transfere jestaun no utilizasaun imóvel ba funsionamentu Uma Mahon iha Oecusse.
Asinatura kontratu interadministrativu ne’e halao iha Salaun MSSI, Kaikoli, Dili, ho prezensa Ministra, Verónica das Dores, Prezidente Autoridade RAEOA, Regio Servante Romeia da Cruz Salu, Vise MSSI, Prezidente INSS, membru Autoridade RAEOA, reprezentante instituisaun públika, diretór no funsionáriu MSSI.
Ministra SolidariedadeSosiálnoInkluzaun, Verónica das Dores hatete katak, Uma Mahon laos de’it edifísiu, maibé espasu protesaun, asisténsia no akompañamentu ba vítima sira husi violénsia, liu liu feto no labarik sira iha situasaun vulnerabilidade.
“Uma Mahon mak espasu ida ba protesaun, asisténsia no akompañamentu ba vítima sira husi violénsia, atu sira bele hetan seguransa no apoiu ne’ebé sira presiza,” hatete Ministra Verónica liu husi nia diskursu iha Salaun MSSI Kaikoli, Sesta (4/09/2026).
Imóvel nee lokaliza iha zona Palabam, besik Campo 1 de Maio, Aldeia Sanane, Suco Costa, Postu Administrativu Pante Macassar, RAEOA. Tuir kontratu, imóvel ne’e sei transfere nia jestaun no utilizasaun administrativu no funsionál ba MSSI, ho finalidade atu instala no halo funsiona Uma Mahon.
MSSI sei asume responsabilidade ba administrasaun, jestaun, utilizasaun, konservasaun no manutensaun imóvel, inklui asegura funsionamentu Uma Mahon tuir finalidade públika.
Ministra Verónica subliña katak, kooperasaun entre MSSI no RAEOA sei sai elementu importante atu asegura sustentabilidade no efetividade servisu protesaun ba vítima sira.
RAEOA sei kontinua partisipa liu husi servisu rejionál kompetente, inklui kooperasaun, akompañamentu no monitorizasaun.
Nunee mos Prezidente Autoridade RAEOA, Regio Servante Romeia da Cruz Salu hatutan tan katak, Uma Mahon iha Oecusse tenke dezenvolve ho multidimensional, laos haree deit ba vítima feto, maibé mos ba kompleksidade relasaun família no problema sosial sira.
Nia hatete, Uma Mahon tenke sai parte husi esforsu atu prevene no responde ba violénsia iha família, no mos edukasaun ba mane sira atu komprende responsabilidade iha família no relasaun ho feto no oan sira.
“Uma Mahon iha Oecusse tenke haree husi multidemensionalidade no harmonia, laos de’it fatin ba feto vítima violénsia, maibé mos tenke haree kompleksidade moris família nian,” hatete Regio.
Regio mos hatete katak Uma Mahon ne’e harii durante lideransa Prezidente Autoridade RAEOA anteriór, Arsenio Babo, no agora sei kontinua dezenvolve iha administrasaun atual atu responde ba nesesidade sosial iha Oecusse.
Nia argumenta, asinatura ne’e laos de’it formalidade entre governu no governu ka entre ministériu no autoridade rejionál, maibé mos reprezenta obrigasaun institusionál RAEOA atu asegura Uma Mahon bele funsiona ho diak.
Tuir informasaun iha serimónia, Uma Mahon iha Oecusse iha kapasidade kuartu 15 no presiza kumpre rekezitu polítiku no institusionál sira atu garante nia funsionamentu ho efetivu.
MSSI no RAEOA kompromete atu kontinua servisu hamutuk atu asegura Uma Mahon jere ho responsabilidade, proteje dignidade no privasidade vítima sira, no fasilita enkaminhamentu ba servisu kompetente.
Objetivu prinsipál husi kooperasaun ne’e mak atu garante vítima sira husi violénsia iha RAEOA bele hetan fatin seguru, protesaun, asisténsia no apoiu sosial ne’ebé sira presiza.
(joa)
