DILI, STLTIMORLESTE.com – Maria do Carmo Gonçalves, pasiente saúde mental, afirma katak nia laen mak ema ne’ebé suporta no akompaña nia durante tratamentu husi 2016 to’o agora.
Maria fahe nia esperiénsia durante komemorasaun Loron Mundial Saúde Mental, ne’ebé hala’o iha salaun Madre, Manleuana, Dili, Kinta (29/10/2026).
Komemorasaun ne’e hala’o ho tema “Rona Esperiénsia Moris, Lian Loloos, Mudansa Loloos”, atu promove komprensaun kona-ba importánsia kuidadu saúde mental hanesan kuidadu saúde fízika.
Maria esplika katak, nia hasoru problema saúde mental husi 2016. Maski dala ruma nia sente di’ak, problema ne’e bele mosu fali no presiza kontinua hetan tratamentu.
Nia konta katak, PRADET observa nia situasaun no ajuda lori nia ba atividade iha Asosiasaun Defisiente Timor-Leste (ADTL).
Liuhusi atividade sira-ne’e, Maria hetan fiar hosi ADTL no hetan oportunidade atu servisu iha área administrasaun APORTIL.
“Durante hau hetan moras ne’e, ema ne’ebé fó suporta mak hau-nia laen. Nia lori hau ba tratamentu no fó aimoruk atu hemu,” dehan Maria.
Nia afirma katak, apoiu hosi nia laen ajuda nia kontinua hetan tratamentu no harii fali nia moris, to’o bele servisu iha APORTIL.
Maria apela ba inan-aman no família sira ne’ebé iha membru ho problema saúde mental atu lori sira ba hetan tratamentu no ajuda sira tuir orientasaun profisionál saúde.
Nia hateten katak, família presiza iha pasiénsia no fó apoiu ba membru família ne’ebé hasoru problema saúde mental, tanba sira presiza komprensaun no kuidadu kontinuu.
“Familia presiza pasiénsia, lori pasiente ba tratamentu no ajuda sira tuir orientasaun kona-ba aimoruk,” dehan Maria.
Nia mós fó hanoin katak, pasiente sira presiza hemu aimoruk tuir orientasaun profisionál saúde no la para tratamentu rasik, maski sente di’ak ona.
Maria husu ba família atu ajuda kontrola tratamentu no asegura pasiente sira hetan apoiu ne’ebé apropriadu atu bele kontinua moris ho di’ak.
(dom)
