BAUCAU, STLTIMORLESTE.com – Timor-Leste iha edifísiu eskola Ensinu Báziku Sentrál no Filial públiku hamutuk 1.117, maibé edifísiu eskola balu, liuliu iha área remota, sei iha kondisaun aat no presiza reabilitasaun.
Diretór-Jerál Pre-Eskolar, Ensinu Báziku no Rekorrente, Apolinário Serpa Rosa, hateten katak bazeia ba dadus infraestrutura Ensinu Báziku, edifísiu eskola balu kontinua sofre estragu tanba utiliza kleur ona no influénsia husi kondisaun klimátika.
“Bazeia ba dadus infraestrutura Ensinu Báziku ne’ebé ita iha, ita rekoñese katak iha eskola lubuk ida ne’ebé ita harii daudaun, maibé iha mós eskola balu ne’ebé sei sofre kondisaun aat,” Apolinário Serpa Rosa hateten ba jornalista sira iha Vila Nova, Baucau, Kinta (29/10/2026).
Nia esplika katak edifísiu eskola sira ne’ebé iha kondisaun aat barak liu iha área remota. Eskola balu harii iha tinan 2010 liuhusi pakote referendum, maibé to’o agora seidauk hetan reabilitasaun tanba difikuldade asesu estrada.
Enkuantu eskola sira ne’ebé fasil asesu, Ministériu Edukasaun kontinua halo reabilitasaun no konstrusaun foun. Ba edifísiu eskola seluk ne’ebé iha kondisaun aat, Ministériu kontinua planeia atu halo hadiak no konstrusaun foun.
“Ministériu Edukasaun iha Governu IX sei kontinua esforsu atu responde gradualmente ba nesesidade reabilitasaun infraestrutura sira-ne’e,” Apolinário dehan.
Nia mós hateten katak atu hetan dadus kompletu kona-ba edifísiu eskola sira ne’ebé iha kondisaun grave, presiza halo koordenasaun ho Diretór Nasionál Infraestrutura.
Atu responde ba difikuldade asesu estrada no reabilitasaun edifísiu eskola iha área remota, Ministériu Edukasaun kontinua servisu hamutuk ho autoridade munisipál no estrutura lokál, liuhusi Programa Nasionál Dezenvolvimentu Suku (PNDS), atu buka solusaun ba problema refere.
“Iha mós PNDS no PDIM ne’ebé sempre halo koordenasaun ho Ministériu. Bainhira servisu infraestrutura eskolar ruma iha munisípiu halo ona, Ministériu labele halo fali servisu hanesan,” nia esplika.
(tom)
