DILI, STLTIMORLESTE.com — Traballadór Timor-oan rihun ba rihun servisu iha rai li’ur, maibé protesaun fraku, garantia kontratu dignu no akompañamentu ba traballadór sira kontinua sai dezafiu ba SEFOPE.
Sekretáriu Estadu Formasaun Profisionál no Empregu (SEFOPE), Rogério Mendonça, hatete iha Palásiu Prezidensiál Nicolau Lobato, Bairru Pite, Kuarta (28/10/2026), katak traballadór Timor-oan barak mak servisu iha rai li’ur, inklui Austrália, Koreia do Sul no Nova Zelándia.
Observadór Ekonomia, Silveiro da Silva, konsidera númeru traballadór sira ne’e hanesan progresu ba programa mobilidade, maibé nia husu atu analiza mós kondisaun servisu, kontratu no benefísiu ne’ebé traballadór sira hetan.
“Rihun ba rihun servisu iha li’ur bele sai susesu, maibé hira mak hetan kontratu dignu no fila mai ho osan hodi hadi’a moris? Ita labele haree de’it númeru,” dehan Silveiro ba STL, iha Kolmera, Díli, Kinta (29/10/2026).
Nia hatutan katak remesa husi traballadór sira kontribui ba ekonomia, maibé SEFOPE tenke asegura protesaun no formasaun adekuada, atu evita traballadór Timor-oan sai vítima esplorasaun iha rai li’ur.
“SEFOPE nia serbisu la’ós haruka de’it, maibé tenke akompaña traballadór sira to’o fila fali no investe iha rai laran,” nia hatutan.
Iha parte ketak Akademista Universidade Nasionál Timor Lorosa’e (UNTL), Adelino de Araujo, mós konsidera katak traballadór barak ne’ebé buka servisu iha rai li’ur hatudu dezafiu merkadu traballu iha rai laran, ne’ebé seidauk absorve joven sira hotu.
“Fenómenu traballadór rihun ba rihun ba li’ur hatudu katak merkadu traballu iha rai laran seidauk absorve joven sira. Ida ne’e dezafiu boot ba Governu atu kria polítika empregu sustentável,” dehan Adelino.
Nia subliña katak Governu no universidade sira tenke servisu hamutuk atu prepara joven sira ho abilidade adekuada, atu bele hetan oportunidade nu’udar traballadór kualifikadu ho saláriu di’ak liu.
Tuir dadus SEFOPE, traballadór Timor-oan na’in 27.403 mak servisu iha Austrália, na’in 8.466 iha Koreia do Sul no na’in 95 iha Nova Zelándia, tuir informasaun ne’ebé Rogério Mendonça aprezenta.
Rogério mós informa katak traballadór foun na’in 140 hetan rekrutamentu atu servisu iha Nova Zelándia. Traballadór na’in 200 resin espera atu sai ba nasaun ne’e durante fulan Novembru.
Rogério esplika katak Prezidente Repúblika rekomenda SEFOPE atu identifika setór empregu foun iha Koreia do Sul, hodi aumenta oportunidade servisu ba Timor-oan.
Setór ne’ebé agora simu traballadór Timor-oan inklui peska, fabrikasaun no agrikultura. SEFOPE mós rekomenda atu buka oportunidade iha ospitalidade no kuidadu ba ema katuas-ferik.
(car)
