DILI, STLTIMORLESTE.com – Profesores hamutuk 42 partisipa iha formasaun, antes sira koloka ba eskola Café iha munisípiu 13, inklui karik balun sei koloka iha Atauro.
Ministra Edukasaun (ME), Dulce de Jesus Soares hato’o informasaun ne’e ba jornalista sira iha Salaun Ian Martin, Balide, tersa-feira (08/09/2026).
“Ohin dader iha INFORDEPE ita halo formasaun ba novos profesores ba eskola Café. Profesores ne’ebé sei hanorin iha eskola Café sira, pasa ona iha bolsa de kandidatu no oras ne’e sira hanorin iha eskola públiku sira iha Timor-Leste. Ita kontenti tebes tanba bainhira sira hanorin iha eskola Café, sira bele aprende mos husi profesores portugés sira, nune’e bele aumenta sira-nia kapasidade, kompeténsia no koñesimentu pedajójiku,” dehan Ministra Dulce.
Nia hateten katak, atu prenxe nesesidade professores iha eskola Café, ME sei uza lista espera husi Bolsa de Kandidatu (BK), liuliu ba área ensinu sekundáriu jeral no tékniku-vokasionál (TekVok).
“Agora iha professores 42 prontu atu tuir formasaun, depois sei koloka ba eskola Café sira, bazeia ba kuadru pesoál eskola Café nian,” nia esplika.
Ministra Edukasaun mos hateten katak ME servisu hamutuk ho Komisaun Funsaun Públika (KFP) iha prosesu rekrutamentu, tanba professores sira ne’e sei sai funsionáriu públiku, maski sira servisu iha rejime espesial.
Nia hateten, formasaun ne’e sei dura loron tolu no sei hala’o iha INFORDEPE, ho partisipasaun husi pesoál Infordepe no parte ensinu ME. Representante husi eskola Café mos sei konvida atu fó informasaun kona-ba regra sira ne’ebé aplika iha eskola Café.
Iha parte seluk, Prezidente KFP, Agostinho Letencio de Deus hateten katak, antes ne’e iha professores balun muda ona ba eskola seluk depois sira pasa prosesu rekrutamentu. Tuir nia, servisu iha eskola Café la’ós deit kona-ba hanorin, maibé mos oportunidade atu professores aprende uza lian Portugés.
“Ami fó apresiasaun ba lideransa Ministra Edukasaun nian, ne’ebé ikus mai konsege rezolve asuntu lubuk ida liga ho professores sira. Ohin abertura formasaun ba professores sira ne’ebé sei ba hanorin iha eskola Café,” nia afirma.
Agostinho hateten katak, tanba lian aprendizajen iha eskola Café mak Portugés, professores sira tenke aproveita oportunidade ne’e atu dezenvolve kapasidade hanorin iha lian Portugés.
Nia subliña katak formasaun inisiál importante tebes ba funsionáriu hotu, liuliu professores, tanba la’ós hotu ne’ebé remata ensinu superiór iha área Edukasaun diretamente iha kapasidade kompleta kona-ba métodu hanorin.
“Formasaun inisiál ne’e importante tebes, tanba professores presiza iha koñesimentu kona-ba métodu hanorin, prosesu aprendizajen no maneira atu maneja labarik sira iha eskola,” nia dehan.
Nia hateten mos katak, formasaun inisiál ne’e sei sai baze atu avalia no determina se funsionáriu ida bele kontinua ba estatutu permanente ka lae.
(eme)
