DILI, STLTIMORLESTE.com – Komisaun C Parlamentu Nasionál aprova ona relatóriu parecer OJE 2027, atu submete ba Prezidente Parlamentu Nasionál.
Prezidente Komisaun C, Cedelízia Faria dos Santos, informa katak aprovasaun nee akontese Kuarta (28/10/2026), iha Parlamentu Nasionál, hafoin leitura no diskusaun.
Komisaun C aprova ona nia relatóriu parecer, no hein katak lokraik bele finaliza atu submete ba Prezidente Parlamentu Nasionál,Cedelízia dehan ba jornalista sira.
Nia hatete katak relatóriu parecer ba OJE 2027 iha kuaze pájina 116, naruk liu kompara ho relatóriu orsamentu tinan sira liubá.
Komisaun permanente espesializada A, B, D, E, F no G konklui ona relatóriu parecer setoriál ida-idak no submete ba Komisaun C.
Relatóriu nee inklui rekomendasaun ba Parlamentu Nasionál no Governu, liuliu atu hadia tabela no korrije númeru kalkulasaun iha proposta orsamentu.
Iha área finansas públikas, komisaun hatoo preokupasaun kona-ba reseita doméstika neebé sei limitadu no sustentabilidade finanseira estadu.
Komisaun mós analiza Regra Sustenabilidade Ekonómika (RSE), neebé tuir esplikasaun prezidente komisaun, iha indikadór neebé kada tinan liu 3%.
Cedelízia afirma katak, OJE 2027 inklui alokasaun ba preparasaun eleisaun rua, apoiu ba munisípiu balu no preparasaun Timor-Leste atu lidera ASEAN iha 2029.
Nia esplika katak, preparasaun ba lideransa ASEAN no desentralizasaun presiza rekursu adisionál, inklui kapital dezenvolvimentu no salariu no vencimentu.
Bainhira ita tama ba desentralizasaun, ita presiza prepara an, inklui rekruta tan funsionáriu atu halao servisu sira neebé presiza,nia afirma.
Relatóriu nee mós inklui rekomendasaun husi audiénsia setoriál ho ministériu no instituisaun relevante, neebé komisaun permanente espesializada sira halao.
Rekomendasaun hirak nee kobre área konstituisaun, negósiu estranjeiru, seguransa no defeza, saúde, juventude, edukasaun no finansas públikas.
Komisaun C hein katak deputadu sira sei analiza rekomendasaun hirak nee iha debate jeral, antes kontinua prosesu diskusaun no avaliasaun ba proposta OJE 2027.
(alb)
