DILI, STLTIMORLESTE.com – Komité Nasionál Revizaun Konstituisaun 2012 husu partidu polítiku sira atu fó hanoin no buka konsensuál kona-ba nesesidade atu halo revizaun ba Konstituisaun RDTL.
Vise-Prezidente Komité Nasionál Revizaun Konstituisaun 2012, Duarte Viana, hateten katak sira hasoru ona partidu FRETILIN no PD, no iha loron 28 Outubru 2026, halao konsultasaun públika ho bankada CNRT iha Parlamentu Nasionál.
Viana esplika katak, sira sei kontinua buka hanoin husi bankada PLP no KHUNTO, atu rona pozisaun husi forsa polítika sira hotu kona-ba prosesu revizaun konstitusionál.
Nia hateten katak, durante konsultasaun, polítiku sira balu defende katak revizaun konstituisaun presiza hetan aprovasaun ho maioria kuartu-kintu no dois-ter sus. Maibé, komité hakarak diskute uluk dalan atu hetan konsensuál entre partidu polítiku sira.
Se ita koalia kona-ba konsensuál, signifika katak ita hotu tenke hamutuk atu halo revizaun ba konstituisaun neebé bele fó sustentabilidade ba povu,Duarte Viana hateten ba jornalista sira iha sala bankada CNRT, Kuarta (28/10/2026)
Nia apela ba deputadu sira nuudar reprezentante povu iha Parlamentu Nasionál, atu asume responsabilidade hodi haree nesesidade revizaun konstitusionál, tanba Konstituisaun RDTL permite atu halo revizaun hafoin liu tinan neen, maibé too agora liu ona tinan 20 nia laran.
Viana hateten katak, CNRT tenke sai inisiadór ba prosesu nee, atu haree se partidu polítiku sira seluk prontu ka lae atu tuir dalan konsensuál.
Nia esplika katak, komité nee kompostu husi reprezentante Igreja, veteranu, akademiku no parte sosiál seluk, neebé servisu ho spiritu voluntariadu hodi kontribui ba bem-estar povu.
Komité nee halo ona konsultasaun públika iha fatin oioin, inklui ho PNTL, no sei kontinua rona opiniaun husi komunidade atu avalia nesesidade revizaun ba Konstituisaun RDTL.
Viana hateten katak, objetivu revizaun mak atu identifika artigu sira neebé konsidera la relevante ona ho realidade moris povu Timor-Leste nian, no artigu sira neebé presiza hadia tuir nesesidade atuál.
Enkuanto Prezidente Bankada CNRT, Patrocínio Fernandes dos Reis hateten katak, enkontru ho komité nee importante tanba fó oportunidade ba bankada atu rona rezultadu peskiza no informasaun neebé komité halibur ona.
Patrocínio esplika katak, komité nee mai husi kamada sosiál oioin, inklui veteranu, Igreja, akademiku no entidade seluk, neebé hakarak kontribui ba bem-estar povu liuhusi proposta atu halo revizaun ba konstituisaun.
Nia hateten katak, Konstituisaun RDTL fó kompeténsia ba deputadu sira atu hahú inisiativa revizaun konstitusionál. Tanba nee, komité halo peskiza no rekolla informasaun husi parte oioin atu avalia se iha duni nesesidade atu halo revizaun ka lae.
Patrocínio subliña katak, rona opiniaun husi bankada parlamentár sira importante, tanba deputadu sira mak bele sai autór inisiativa ba revizaun konstitusionál.
Nia konsidera katak, rezultadu enkontru nee bele sai referénsia ba bankada CNRT atu loke komunikasaun ho partidu polítiku no forsa polítika sira seluk, hodi komprende sira-nia vizaun no hanoin kona-ba prosesu revizaun nee.
Nee mak pasu ida neebé ita hahú ona. Ami agradese komité tanba hahú ona prosesu ida nee,Patrocínio Fernandes dos Reis hateten.
Prosesu konsultasaun nee sei kontinua hodi buka konsensuál entre parte sira, molok desizaun kona-ba inisiativa revizaun ba Konstituisaun RDTL.
(alb)
