DILI, STLTIMORLESTE.com – Bispu Maliana, Dom Norberto do Amaral hateten, transladasaun restu mortais preladus sira realiza esperansa igreja no povu ne’ebé hein durante tinan barak.
Nia hatoo mensajen ne’e iha Misa Tasi Tolu, Kinta (10/09/2026), hodi fó omenajen ba Saudozu Dom Alberto Ricardo da Silva.
Dom Norberto hateten, preladus sira fila mai Timor ho memória no istória neebe la bele haluha, tanba sira fo moris ba igreja no povu.
“Imi Kreda Timor hamutuk fali ho ami. Rai Timor hadomi imi, inan simu imi iha Lalehan,” husu Amu Norberto.
Nia lembra, Saudozu Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes, neebe mate no hakoi iha Portugal.
Tuir Dom Norberto, prosesu transladasaun hahu ho diskusaun iha CET iha 2015, bainhira Dom Basílio sai Prezidente CET.
Prosesu ne’e kontinua iha lideransa Dom Virgílio, ho apoiu Assembleia Plenária CET, to’o realiza transladasaun restu mortais Preladus nain haat.
Nia subliña, prosesu ne’e lao ho espíritu sinodal, komuñaun no kolaborasaun entre Igreja no Governu Timor-Leste.
Delegasaun Igreja hasoru Prezidente Repúblika José Ramos-Horta no Primeiru-Ministru Kay Rala Xanana Gusmão atu informa planu transladasaun no husu apoiu.
Dom Norberto hateten, enkontru ho PM Xanana determinante, tanba Governu fó apoiu no forma ekipa konjunta ho Igreja.
Nia mos agradese família Saudozu Dom Alberto Ricardo da Silva tanba pasiénsia, kooperasaun no vontade atu hein prosesu transladasaun too remata.
Atividade omenajen, reza no misa hala’o husi loron 1 too 10 Setembru, antes taka ho Misa Solene no serimónia funerál.
(joa)
